بىشكەكتە «اباي اقىنعا مىڭ تاعزىم» كونسەرتى ءوتتى
سالتاناتتى شاراعا ق ر مادەنيەت جانە سپورت ءمينيسترى اقتوتى رايىمقۇلوۆا، قىرعىز رەسپۋبليكاسى پرەزيدەنتىنىڭ ءىس باسقارۋشىسى سۇيىنبەك قاسمامبەتوۆ، قىرعىزستاننىڭ مادەنيەت، اقپارات، سپورت جانە جاستار ساياساتى ءمينيسترى قايرات يماناليەۆ، تۇركسوي ۇيىمىنىڭ باس حاتشىسى دۇيسەن قاسەيىنوۆ، وزبەكستان مادەنيەت ءمينيسترىنىڭ ورىنباسارى اليمجون ميرزايەۆ جانە باسقا دا ەلشىلىك وكىلدەرى مەن قوعام قايراتكەرلەرى قاتىستى. سۇيىنبەك قاسمامبەتوۆ قىرعىز رەسپۋبليكاسىنىڭ پرەزيدەنتى سادىر جاپاروۆتىڭ حاكىم ابايدىڭ 175 جىلدىعىنا ارنالعان قۇتتىقتاۋ حاتىن وقىپ بەرىپ، اقتوتى رايىمقۇلوۆاعا تابىستادى. ال قايرات يماناليەۆ ۇلى اعارتۋشى، قوعام قايراتكەرىنىڭ ءومىر جولىنا توقتالىپ، اباي شىعارماشىلىعى قىرعىزستاندا دا تانىمال ەكەنىن، كۇنى بۇگىنگە دەيىن قىرعىز ساحناسىندا جىرلارى وقىلاتىنىن جەتكىزدى.
ءوز كەزەگىندە اقتوتى رايىمقۇلوۆا ابايدىڭ 175 جىلدىعىنا ارنالعان ءىس- شاراعا قاتىسۋشىلارعا العىس ايتتى. ايتا كەتەيىك، كونتسەرتكە قازاقستان، قىرعىزستان، وزبەكستان، تۇركىمەنستان مەن تۇركيا ونەرپازدارى قاتىستى.