اۋىر اتلەتيكادان قازاقستان چەمپيوناتى ونلاين فورماتتا وتەدى
ەل بىرىنشىلىگى ونلاين فورماتتا وتەدى، دەپ حابارلايدى قازاقپارات Olympic.kz سايتىنا سىلتەمە جاساپ.
الدىن الا مالىمەت بويىنشا، ۇلتتىق بىرىنشىلىككە ەلىمىزدىڭ بارلىق ايماعىنان 300 دەن اسا سپورتشى قاتىسادى.
«بيىلعى قاڭتاردان باستاپ الداعى ازيا چەمپيوناتىنا قارقىندى دايىندالىپ جاتىرمىز. بۇگىندە باپكەرلەر قۇرلىق دوداسىنا قاتىساتىن 17 اۋىر اتلەتتى تاڭداپ الدى. ونىڭ ىشىندە جەتى ايەل، ون ەر ادام بار. قاتىسۋشىلار ەسىمىن ەل چەمپيوناتى اياقتالعان سوڭ جاريالايمىز. بۇل جولى دا ءبىز جارىستى ۇيرەنشىكتى ونلاين فورماتتا وتكىزەمىز. ءبىزدىڭ سپورتىمىز ءۇشىن بۇل نۇسقا ىڭعايلى. جارىستىڭ ءوتۋ بارىسىنا ايتارلىقتاي كەدەرگى كەلتىرمەيدى. ەكىنشى جاعىنا، ازيا چەمپيوناتى قارساڭىندا سپورتشىلاردىڭ ۆيرۋس جۇقتىرىپ الۋ ءقاۋپىنىڭ الدىن الادى»، - دەيدى ۇلتتىق قۇرامانىڭ باس باپكەرى باقىت احمەتوۆ.
ايتا كەتەلىك، تۋرنير 17- ناۋرىزعا دەيىن جالعاسادى.