ساراپشىلار بۇل سيمپتومدار قاۋىپتى ەمەس جانە اعزانىڭ ۆاكسيناعا قالىپتى رەاكسياسى دەگەن قورىتىندىعا كەلدى.
قازاقپارات بۇل تۋرالى ب ۇ ۇ جاڭالىقتارى سايتىنا سىلتەمە جاساپ حابارلايدى.
كىشى كوميتەت مۇشەلەرى ۆاكسينانىڭ كلينيكالىق سىناقتارى بارىسىندا الىنعان دەرەكتەردى زەردەلەپ، ولاردى جاناما اسەرلەر تۋرالى بىرنەشە ەلدەن كەلىپ تۇسكەن حابارلامالارمەن سالىستىرعان. سيمپتومداردىڭ قاتارىندا باس اۋرۋى، السىزدىك، بۇلشىقەت اۋرۋى، دەنە قىزۋى جانە قالتىراۋ بار. ولار ءالسىز نەمەسە ورتاشا دارەجەدە ءبىلىنۋى مۇمكىن، ادەتتە بىرنەشە كۇن ىشىندە كەتەدى. مۇنداي جاناما اسەرلەر 55 جاسقا دەيىنگى ناۋقاستاردا ءجيى كەزدەسەدى. د د س ۇ كىشى كوميتەتىنىڭ مۇشەلەرى تۇماۋعا ۇقساس بەلگىلەر كەز كەلگەن ەكپەگە يممۋندىق جاۋاپتىڭ كورىنىسى بولۋى مۇمكىن ەكەنىن اتاپ ءوتتى. COVID-19-عا قارسى ۆاكسينالارعا كەلەتىن بولساق، ولاردىڭ پىكىرىنشە، مۇنداي جاناما اسەرلەر «كۇتىلگەن جاعداي».
د د س ۇ ساراپشىلارى ۆاكسينالاۋدىڭ قاۋىپسىزدىگى مەن تيىمدىلىگى كورسەتكىشتەرىن ەسكەرە وتىرىپ، ەكپە سالدىرۋعا تاعى دا كەڭەس بەرۋدە. قازىرگى ۋاقىتتا ساراپشىلار بۇعان دەيىن ازىرلەنگەن ۇسىنىستارعا وزگەرىس ەنگىزۋ قاجەت دەپ سانامايدى. سونىمەن بىرگە، ولار پاتسەنتتەرگە تۇماۋعا ۇقساس بەلگىلەر تۋرالى حابارلاۋعا جانە قاجەت بولعان جاعدايدا ولارعا مەديتسينالىق كومەك كورسەتۋگە كەڭەس بەرەدى. ساراپشىلار ۆاكسينانىڭ ءبىرىنشى دوزاسىن ەنگىزگەننەن كەيىن پايدا بولعان سيپاتتالعان جاعىمسىز قۇبىلىستار ەكىنشى دوزانى سالۋعا كەدەرگى بولماۋى تيىستىگىن اتاپ كورسەتەدى.