بەردىبەك ساپاربايەۆ جايىلىمدىقتى بولىسە الماعان اۋىل تۇرعىندارىمەن كەزدەستى

تاراز. قازاقپارات - جامبىل وبلىسىنىڭ اكىمى بەردىبەك ساپاربايەۆ ت. رىسقۇلوۆ اۋدانىنا جۇمىس ساپارى بارىسىندا جايىلىمدىق جەرلەردى بولۋگە قاتىستى جەرگىلىكتى تۇرعىندار اراسىندا داۋ تۋىنداعان تەرەڭوزەك اۋىلىندا بولدى، دەپ حابارلايدى قازاقپارات ءتىلشىسى.

جالپى، تەرەڭوزەك اۋىلدىق وكرۋگى اۋماعىنداعى جايىلىمدىق جەر كولەمى 42233 گەكتاردى قۇرايدى. مال باعۋعا ارنالعان وسىنداي اۋقىمدى اۋماق بولا تۇرا، جەرگىلىكتى تۇرعىندار ءوزارا كەلىسىمگە كەلە الماۋدا. تەرەڭوزەكتىكتەر وزدەرى ايتقانداي، اۋىلداعى كوپتەگەن وتباسىلار قورالارىندا ونشاقتى ءىرى قارا جانە ۇساق مالدار مەن جىلقىلار ۇستايدى. كەيبىرەۋلەرىندەگى مال سانى ءجۇز باسقا دەيىن جەتەدى.

ءۇش مىڭنان استام ادام تۇراتىن اۋىلدىق وكرۋگتە 2493 ءىرى قارا، 34625 ۇساق مال جانە 1144 -جىلقى بار. بارلىعى 85 شارۋا قوجالىعى تىركەلگەن. جاقىندا عانا 2305 ادام تۇراتىن تەرەڭوزەك اۋىلىنىڭ تۇرعىندارى الەۋمەتتىك جەلىلەردە جايىلىمدىق جەرلەردىڭ جەتىسپەۋشىلىگىن ايتىپ، شاعىمدانعان بولاتىن. كەزدەسۋ بارىسىندا ت. رىسقۇلوۆ اۋدانىنىڭ اكىمى ەربولات سادىرقۇلوۆ تۇرعىندار اراسىنداعى كەلىسپەۋشىلىك اۋىل ىرگەسىندەگى جايىلىمدىق جەرلەرگە قاتىستى تۋىنداعانىن اتاپ ءوتتى. الايدا، ول بۇل جەرلەردى ءبولۋ بەكىتىلگەن نورمالارعا سايكەس جۇرگىزىلگەنىن جەتكىزدى. ول تۇرعىندارعا اۋىل سىرتىنداعى 12622 گەكتار جايىلىمدىق جەرلەردى پايدالانۋ بويىنشا ۇسىنىس بىلدىرگەن. جەرگىلىكتى تۇرعىن الپىس دۇرمەنوۆ جەر ءبولۋ كەزىندە ءار اۋلاداعى ادام سانى ەسكەرىلمەگەنىن العا تارتادى.

«مەنىڭشە، جايىلىمدىق جەرلەر بالالار سانىنا قاراماي، ءارتۇرلى بولىنۋدە. كوپ بالالى وتباسىلارعا دا، ءبىر بالالى وتباسىلارعا دا بىردەي كولەمدەگى جايىلىم تيەدى»، - دەدى ول.

وبلىس اكىمى كەز كەلگەن ماسەلە زاڭ شەڭبەرىندە شەشىلەتىنىن اتاپ ءوتتى. «ەشقانداي جەر پايدالانۋسىز جاتپاۋى كەرەك، ول تابىس اكەلۋى ءتيىس. سوندىقتان ءبىر اپتا ىشىندە اۋدان جانە اۋىل اكىمدەرى وسى ەلدى مەكەن ماڭىنداعى جەرلەرگە تالداۋ جۇرگىزەدى. پايدالانۋسىز جاتقان جەرلەردى يەلەرى مەملەكەتكە قايتارۋى كەرەك. ول جەرگىلىكتى تۇرعىندارعا مال سانىنا سايكەس بولىنەدى»، - دەپ ءتۇسىندىردى بەردىبەك ساپاربايەۆ.

دەگەنمەن، ايماق باسشىسى مالدىڭ نەگىزگى بولىگى اۋىل سىرتىعىنداعى جايىلىمداردا جايىلۋى تيىستىگىن تىلگە تيەك ەتىپ، وندا جەردىڭ جەتكىلىكتى ەكەندىگىن باسا ايتتى.

«قالاي دەسەك تە، اۋىلدىڭ ىرگەسىندەگى جەر بارىنە بىردەي جەتپەيدى. سوندىقتان، مالشى جالداپ، الىسقا جايۋعا تۋرا كەلەدى. سونداي- اق، مۇنداي شاعىن اۋماقتا 80-نەن استام شارۋا قوجالىعىنىڭ بولۋى - وتە كوپ، ولاردى بىرىكتىرۋ قاجەت. بۇعان جەرگىلىكتى اقساقالدار اتسالىسقانى ابزال. جالپى، بۇل ماسەلەلەردىڭ بارلىعىن اۋىلدىڭ بۇرىنعى اكىمى شەشۋى كەرەك ەدى»، - دەپ اتاپ ءوتتى ءوڭىر باسشىسى.

سونداي- اق، بەردىبەك ساپاربايەۆ تەرەڭوزەك تۇرعىندارىنا اۋىل شارۋاشىلىعى داقىلدارىن وسىرۋدە ءۇي ماڭىنداعى جەرلەردى ءتيىمدى يگەرۋدىڭ ماڭىزدىلىعىنا توقتالدى. كەزدەسۋ بارىسىندا باسقا دا وزەكتى جايتتار قاۋزالىپ، اۋىل شارۋاشىلىعى ونىمدەرىن قايتا وڭدەۋ ماسەلەسىنە دە دەن قويىلدى.

اۆتور: سايا سەمباي