يزرايلدەگى ەكولوگيالىق اپات: تازالاۋ جۇمىستارىنا ايلار، ءتىپتى جىلدار كەتۋى مۇمكىن
15:42, 22 - اقپان 2021
تەل- اۆيۆ. قازاقپارات - جەرورتا تەڭىزىندە مۇناي ونىمدەرىنىڭ توگىلۋى سالدارىنان يزرايل جاعالاۋىنىڭ 160 شاقىرىمعا جۋىق ۋچاسكەسى گۋدرون نەمەسە شايىرعا ۇقساس قارا ءۇيىندى جامىلدى.
بۇل ەلدىڭ تابيعاتى مەن جانۋارلار الەمى ءۇشىن ەكولوگيالىق اپات، دەپ حابارلايدى قازاقپارات Deutsche Welle-گە سىلتەمە جاساپ.
جەكسەنبى كۇنى يزرايل بيلىگى ادامداردى جەرورتا تەڭىزىنىڭ جاعاجايلارىنان الىس جۇرۋگە ەسكەرتتى، سەبەبى وندا الىپ مۇناي داعىن تازالاۋ جۇمىستارىمەن مىڭداعان جۇمىسشى مەن ەرىكتىلەر اينالىسىپ ءجۇر. يزرايل ەلىنىڭ قورشاعان ورتانى قورعاۋ مينيسترلىگىنىڭ باعالاۋىنشا، قارا ۇيىندىلەر بەلگىسىز كەمەدەن ونداعان نەمەسە جۇزدەگەن توننا مۇنايدىڭ توگىلۋى سالدارىنان بولعان. يزرايلدىڭ تابيعات جانە ساياباقتار باسقارماسى مۇنايدىڭ توگىلۋىن ەل تاريحىنداعى «ەڭ كۇردەلى ەكولوگيالىق اپاتتاردىڭ ءبىرى» دەپ اتادى. رەسمي تۇلعالار تازالاۋ جۇمىستارىنا ايلار، ءتىپتى جىلدار ءوتۋى مۇمكىن ەكەنىن مالىمدەدى.
اۆتور: زارينا تۋعانبايەۆا