كوروناۆيرۋس: ۆاكسينا سالدىرعىسى كەلەتىن ەلوردالىقتار قاشان ءوتىنىم بەرە الادى

نۇر- سۇلتان. قازاقپارات - نۇر- سۇلتان قالاسىنىڭ باس مەملەكەتتىك سانيتارلىق دارىگەرى سارحات بەيسەنوۆا ەلوردا تۇرعىندارى كوروناۆيرۋسقا قارسى ۆاكسينانى ءوز قالاۋىمەن قاشان سالدىرا الاتىنىن ايتىپ بەردى، دەپ حابارلايدى قازاقپارات ءتىلشىسى.

«1 - اقپاننان باستاپ مەديتسينا قىزمەتكەرلەرىن ۆاكسينالاۋ باستالدى. 1- اقپاننان بۇگىنگە دەيىن 2008 مەديتسينا قىزمەتكەرىنە ۆاكسينا ەگىلدى. ەكىنشى كەزەڭدە - پەداگوگتەر مەن كۇش قۇرىلىمدارىنىڭ قىزمەتكەرلەرى ۆاكسينا الادى. ودان كەيىن ءساۋىر ايىندا - ستۋدەنتتەر تۇر. ال ءوز قالاۋىمەن ۆاكسينا سالدىرعىسى كەلەتىن قالا تۇرعىندارى مامىر ايىندا ەكپە الا الادى»، - دەدى س. بەيسەنوۆا نۇر- سۇلتان قالاسىنىڭ اكىمدىگى ۇيىمداستىرعان ونلاين- بريفينگتە.

ايتا كەتەيىك، نۇر- سۇلتاندا اقپان ايىنىڭ باسىنان بەرى كوروناۆيرۋستىڭ 2192 جاعدايى تىركەلگەن. ەلوردادا كوروناۆيرۋسپەن اۋىرعانداردىڭ نەگىزگى ۇلەسى - 30-39 جاستا. قازىرگى ۋاقىتتا ەلوردادا 21 مەكتەپتە كارانتين جالعاسۋدا.

اۆتور: ايجان سەرىكجان قىزى