قازاقستاننىڭ قۇپيا سانالعان گەولوگيالىق دەرەكتەرى جاريا ەتىلمەك
بۇل تۋرالى ءماجىلىس دەپۋتاتتارىنىڭ رەسمي ساۋالىنا وراي ق ر ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«قازاقستاننىڭ مينەرالدىق- شيكىزات بازاسىن تولىقتىرۋ جانە گەولوگيالىق زەردەلەنۋىن ارتتىرۋ ماقساتىندا مينيسترلىك كەلەسى جۇمىستاردى جۇرگىزۋدە. گەولوگيالىق بارلاۋ سالاسىن دامىتۋ بويىنشا ۇلتتىق جوبا ازىرلەنۋدە. وسى جوبانىڭ اياسىندا كەندى جانە كەنسىز ايماقتاردىڭ الەۋەتىن اشۋعا مۇمكىندىك بەرەتىن جاڭا عىلىمي نەگىزدەلگەن جۇمىستار جوسپارلاناتىن بولادى. گەولوگيالىق اقپاراتتى قۇپياسىزداندىرۋ بويىنشا جۇمىستار جۇرگىزىلىپ جاتىر. ونىڭ ىشىندە بۇرىن قۇپيا بولىپ سانالعان جەكەلەگەن سيرەك كەزدەسەتىن جەر مەتالدارىنا (ليتي، تانتال، نيوبي) اشىق قولجەتىمدىلىك قامتاماسىز ەتىلەدى»، - دەدى مينيستر.
ونىڭ اتاپ وتۋىنشە، جەر قويناۋىن مەملەكەتتىك گەولوگيالىق زەرتتەۋدى دامىتۋ جانە جاڭا پەرسپەكتيۆتى ۋچاسكەلەردى تابۋ ىقتيمالدىعىن ارتتىرۋ بولىگىندە 1:50 000 ماسشتابىندا جەر قويناۋىن كەڭ اۋقىمدى وڭىرلىك 3 گەولوگيالىق زەرتتەۋدى زاماناۋي زەرتتەۋ ادىستەرىمەن جۇرگىزۋ جونىندەگى نورماتيۆتىك- ادىستەمەلىك نۇسقاۋلىقتار دايىندالىپ جاتىر. مينەرالدىق- شيكىزات بازاسىن تولىقتىرۋ، جەر قويناۋىن گەولوگيالىق زەرتتەۋ، گەولوگيالىق بارلاۋدى باسقارۋ جونىندەگى ءبىرىڭعاي مەملەكەتتىك ساياساتتى ىسكە اسىرۋ ماقساتىندا مەملەكەتتىك جەر قويناۋى قورىن باسقارۋ باعدارلاماسىن ازىرلەۋگە جانە بەكىتۋگە (ە م جانە ي ي د م كەلىسىمى بويىنشا) جانە مينيسترلىكتىڭ قولدانىستاعى ينفراقۇرىلىم مەن ينسپەكتورلىق قۇرامى اياسىندا ەكولوگيا، گەولوگيا جانە تابيعي رەسۋرستار مينيسترلىگىن قاتتى پايدالى قازبالار بولىگىندە مەملەكەتتىك باقىلاۋدى ورىنداۋ بويىنشا جاۋاپتى دەپ ايقىنداۋ ۇسىنىلدى.
«وسىلايشا، گەولوگيالىق بارلاۋعا ينۆەستيتسيالار اعىنىن ىنتالاندىرۋ تەتىكتەرىن جەتىلدىرۋ جەر قويناۋىن گەولوگيالىق زەرتتەۋدىڭ ينۆەستيتسيالىق تارتىمدىلىعىن ارتتىرۋعا، مينەرالدىق- شيكىزات بازاسىن مولايتۋدى جانە جاڭا كەن ورىندارىن اشۋدى قامتاماسىز ەتۋگە مۇمكىندىك بەرەدى»، - دەدى قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار ءمينيسترى ماعزۇم مىرزاعاليەۆ.
اۆتور: مارلان جيەمباي