الماتى وبلىسىنىڭ كوكسۋ اۋدانىندا جەراستى سۋلارى كوتەرىلىپ جاتىر
كوكسۋ اۋدانىندا جەراستى سۋلارى كوتەرىلىپ، ەگىس القاپتارىن ءجيى باسىپ قالۋدا. «كوكسۋ اۋدانى بويىنشا 196 شاقىرىمدى قۇرايتىن 34 درەناج كانالى بار. وسى كانالدىڭ جاعدايى وتە ناشار. 30 جىلدان استام ۋاقىت تازالانباعان. سالدارىنان ەگىستىك جەرلەردە جەراستى سۋلارى كوتەرىلىپ، تۇزدانىپ، قامىس باسىپ جاتىر»، - دەدى ەسەپتىك كەزدەسۋدە شارۋا قوجالىعىنىڭ جەتەكشىسى سەكەنباي شەڭگەلبايەۆ.
شارۋا درەناجدى قازۋ جۇمىستارىنىڭ جوبالىق- سمەتالىق قۇجاتتارىنىڭ دايىن ەكەنىن جەتكىزىپ، اماندىق باتالوۆتان قارجى بولۋگە ىقپال ەتۋدى سۇرادى. وبلىس اكىمى بۇل ماسەلە نازاردا ەكەنىن ايتىپ، بيىلعى جىلدىڭ بيۋدجەتىن ناقتىلاۋ بارىسىندا درەناجدى ارىقتار قازۋعا قارجى قاراستىرىلاتىنىن اتاپ ءوتتى.
«سۋارمالى جەرلەردىڭ ءبارىن قالپىنا كەلتىرۋگە 200 ميلليون تەڭگە ءبولىپ بەرەمىز. بۇل ماسەلەنى جاقسى بىلەمىز. جۇمىس جاساپ جاتىرمىز»، - دەدى اماندىق باتالوۆ.
اۆتور: سامال قابىشيەۆا