كوروناۆيرۋسقا قارسى ەكپە العاننان كەيىن قالاي كۇتىنۋ كەرەك - دارىگەر جاۋابى

نۇر- سۇلتان. قازاقپارات - ورتالىق كوممۋنيكاتسيالار ورتالىعىندا وتكەن بريفينگتە دارىگەر كورناۆيرۋسقا قارسى ەكپە العاننان كەيىن قالاي كۇتىنۋ كەرەكتىگى ايتىلدى، دەپ حابارلايدى قازاقپارات ءتىلشىسى.

«ەگەر ەكپەدەن كەيىن دەنە قىزۋى 37,0-37,5 ارالىعىندا كوتەرىلەتىن بولسا ادام ەمحاناداعى دارىگەرىنىڭ باقىلاۋىندا بولۋى كەرەك. وكىنىشكە قاراي، كوروناۆيرۋس وكپەنى عانا ەمەس، بۋىنداردى دا زاقىمدايدى. ەكپەدەن كەيىن دەنە قىزۋى كوتەرىلگەن ادام ەڭ بولماعاندا قان تالداۋىن جاساتۋى كەرەك. قاجەت بولعان جاعدايدا ساۋلەلى دياگنوستيكا جاسالادى. وسى تەكسەرىستىڭ ناتيجەسىندە ونىڭ جاعدايى قالاي ەكەنى، قالاي ەمدەۋ كەرەك ەكەندىگى انىقتالادى»، - دەيدى «كارديولوگيا جانە ىشكى اۋرۋلار» ع ز ي- ءدىڭ ىشكى اۋرۋلار كافەدراسىنىڭ پروفەسسورى، مەديتسينا عىلىمدارىنىڭ دوكتورى ساۋلە قاسەنوۆا.

«سانيتاريالىق- ەپيدەميولوگيالىق ساراپتاما جانە مونيتورينگ عىلىمي- پراكتيكالىق ورتالىعى» فيليالى ديرەكتورىنىڭ ورىنباسارى مانار سماعۇل ەكپەدەن كەيىن دەنە قىزۋى كوتەرىلىپ، بۋىنداردىڭ اۋىرۋى - كۇتىلەتىن رەاكسيا ەكەنىن ايتتى.

«ۆاكسينا ەككەنگە دەيىن دە، كەيىن دە كۇتىنۋ كەرەك. اللەرگيا بولماس ءۇشىن بۇرىن جەپ كورمەگەن تاعامدى دا جەمەي تۇرا تۇرعان ءجون. سونداي- اق، بۇرىن قولدانىپ كورمەگەن ءاتىردى دە قولدانباۋ كەرەك. ەكپە ەكتىرگەننەن كەيىن «كورناۆيرۋسپەن ەندى اۋىرمايمىن» دەپ ويلاپ قالۋعا بولمايدى. ماسكا تاعىپ، ساقتىق شارالارىن قولدانۋدى جالعاستىرا بەرۋ كەرەك، سەبەبى كوروناۆيرۋسقا قارسى يممۋنيتەت قالىپتاسۋى ءۇشىن ۋاقىت كەرەك»، - دەيدى ول.

ايتا كەتەيىك، 1- اقپاندا قازاقستاندا كوروناۆيرۋس ينفەكسياسىن جۇقتىرۋ جانە تاراتۋ تاۋەكەلى جوعارى ساناتتاردى كوروناۆيرۋسقا قارسى ۆاكسينالاۋ باستالدى. قازاقستاندا ۆاكسينا ەرىكتى تۇردە سالىنادى.

اۆتور: زارينا قاھارمان