ەلوردادا جەڭىل اتلەتيكادان اشىق چەمپيونات باستالدى

نۇر-سۇلتان. قازاقپارات - ەلوردادا جەڭىل اتلەتيكادان اشىق چەمپيوناتى باستالدى، دەپ حابارلايدى قازاقپارات مادەنيەت جانە سپورت مينيسترلىگىنە سىلتەمە جاساپ.

بۇگىن Qazaqstan جەڭىل اتلەتيكا كەشەنىندە تاۋەلسىزدىكتىڭ 30 جىلدىعى اياسىندا نۇر-سۇلتان قالاسىنىڭ ەرەسەكتەر مەن جاس وسپىرىمدەر اراسىندا Nur- Sultan Open 2021 اشىق چەمپيوناتى باستالدى.

وعان مادەنيەت جانە سپورت ءمينيسترى اقتوتى رايىمقۇلوۆا، ەلوردا اكىمى، نۇر-سۇلتان قالاسى جەڭىل اتلەتيكا فەدەراتسياسىنىڭ پرەزيدەنتى التاي كولگىنوۆ قاتىستى.

مينيستر ەلىمىزدە جاستاردىڭ جەڭىل اتلەتيكاعا دەگەن قىزىعۋشىلىعى جوعارى ەكەنىن اتاپ ءوتتى.

«Qazaqstan جەڭىل اتلەتيكا كەشەنى مىڭ كورەرمەنگە ارنالعان، كەز كەلگەن دارەجەدەگى حالىقارالىق جارىستى، الەمدىك دودالاردى وتكىزۋگە بولادى. وزدەرىڭىز بىلەتىندەي، جەڭىل اتلەتيكا سپورتتىڭ كەڭ تاراعان ءتۇرى. بۇگىنگى تاڭدا، قازاقستان جەڭىل اتلەتتەرى وليمپيادا، الەم چەمپيوناتى مەن حالىقارالىق جارىستاردا جوعارى ناتيجە كورسەتىپ جاتىر. بۇل سپورت تۇرىنەن وليمپيا ويىندارىندا العاشقى التىندى 2000-جىلى سيدنەيدە (اۋستراليا) ولگا شيشيگينا يەلەندى.

ونىمەن قاتار دميتري كارپوۆ، ولگا رىپاكوۆا سەكىلدى الەم مويىنداعان سپورتشىلارىمىز بار. الداعى ۋاقىتتا دا ەلىمىزدىڭ اتىن تانىتاتىن جاس سپورتشىلار كوپتەپ شىعادى دەگەن ۇمىتتەمىز. تاۋەلسىزدىك رۋحىمەن ءوسىپ كەلە جاتقان بۇگىنگى جاس بۋىن - ءبىزدىڭ ەرتەڭگى ءۇمىتىمىز، سەنىمدى تىرەگىمىز. بارشاڭىزدى، جەڭىل اتلەتيكا كەشىنىنىڭ سالتاناتتى اشىلۋىمەن شىن جۇرەكتەن قۇتتىقتايمىن! جارىسقا قاتىسۋشىلارعا ساتتىلىك تىلەيمىن»، - دەدى اقتوتى رايىمقۇلوۆا.

اشىق چەمپيونات جەڭىل اتلەتيكانىڭ 5 تۇرىنەن (يادرو لاقتىرۋ، 4*200 مەترگە ارالاس ەستافەتا، ۇزىندىققا سەكىرۋ، جۇگىرۋ جانە جەڭىل اتلەتيكالىق ءجۇرىس) ءوتىپ جاتىر.

جارىسقا س ق و، قاراعاندى، اقمولا، قوستاناي وبلىسى مەن شىمكەنت، نۇر-سۇلتان قالاسىنان كەلگەن 150 دەن استام سپورتشى قاتىسىپ جاتىر.