قوسشى نۇر-سۇلتانعا قوسىلا ما
بۇل ساۋالعا بۇگىن قالا تۇرعىندارىمەن ەسەپ بەرۋ كەزدەسۋىندە ەلوردا اكىمى التاي كولگىنوۆ جاۋاپ بەردى، دەپ حابارلايدى قازاقپارات ءتىلشىسى.
«قوسشى اۋىل ەمەس، ۇلكەن قالا بولدى. ءبىز اقمولا وبلىسى اكىمدىگىمەن تىعىز جۇمىس ىستەيمىز. وتكەن جىلى كارانتين كەزىندە قوسشىنى بلوك- پوستتىڭ ىشىنە قوستىق. نەگە؟ ويتكەنى، تۇرعىندارىنىڭ باسىم بولىگى قالادا جۇمىس ىستەيدى، وقيدى، ەم الادى. بۇكىل قىزمەتتەردىڭ بارلىعى قالادا سىزدەر ءۇشىن اشىق، ونى ەشىكىم شەكتەمەيدى. تاپ وسىنداي قوسشى سەكىلدى قالانىڭ ماڭايىندا بىرنەشە ەلدى مەكەن بار. ۋربانيزاتسيا جۇيەسىندە اگلومەراتسيا دەگەن بار. ياعني، ۇلكەن قالانىڭ توڭىرەگىندە قالاشىقتار پايدا بولادى. ول زاڭدىلىق»، - دەدى التاي كولگىنوۆ قوسشى ەلدى مەكەنى تۇرعىنىڭ ساۋالىنا وراي.
ونىڭ ايتۋىنشا، قالانىڭ اۋماعىندا 16 تۇرعىن ءۇي الابى بار. ولاردا 300 مىڭعا جۋىق ادام تۇرادى، ماسەلەلەرى دە جەتكىلىكتى. اقمولا وبلىسى نۇر-سۇلتان قالاسىمەن بىرگە تىعىز جۇمىس اتقارادى. قازىر قالاعا قوساتىن ەشقانداي جوسپار جوق. سەبەبى بىزدە قالا اۋماعىنداعى تۇرعىن ءۇي الاپتارىمەن اينالىساتىن ماسەلەلەر جەتكىلىكتى. ءوڭىر-قالا بولىپ بىرلەسە جۇمىس اتقارۋعا دايىنبىز»، - دەدى التاي كولگىنوۆ.
اۆتور: مارلان جيەمباي