ەردوعان تۇركيانىڭ العاشقى پيلوتسىز ەلەكتروبۋسىن سىناپ كوردى
11:59, 03 - اقپان 2021
انكارا. Anadolu-قازاقپارات - تۇركيا پرەزيدەنتى رەجەپ تايىپ ەردوعان دۇيسەنبىدە العاشقى وتاندىق پيلوتسىز ەلەكتر اۆتوبۋسىن سىناقتان وتكىزدى، دەپ حابارلايدى قازاقپارات Anadolu اگەنتتىگىنە سىلتەمە جاساپ.
Karsan كومپانياسىنىڭ پيلوتسىز ەلەكتروبۋسى ەل پرەزيدەنتىنىڭ اكىمشىلىگى كەشەنىنىڭ اۋماعىندا تانىستىرىلدى.
قوزعالىس بارىسىندا مۇلدەم دەرلىك دىبىسى بولمايتىن اۆتوبۋستىڭ ۇزىندىعى 8 مەتر.
تۇركيا باسشىسى جىل سوڭىنا دەيىن ۇزىندىعى 24 مەترلىك پيلوتسىز ەلەكتر اۆتوبۋسىن قۇراستىرۋ جوسپارلانىپ وتىرعانىن ايتتى.
«تۇركيا ەلەكتروبۋستار نارىعىندا لايىقتى ورىن الاتىنىنا سەنىمدىمىن. جاقىندا اۆتوبۋستاردىڭ سەريالىق ءوندىرىسى جولعا قويىلادى»، - دەدى ەردوعان.
سونداي-اق وتاندىق پيلوتسىز ەلەكتر اۆتوبۋستارىن جاپپاي ءوندىرۋدىڭ ارقاسىندا تۇركيا الەمدىك اۆتوموبيل نارىعىنىڭ وسى سەگمەنتىندە ءوز ورنىن تاباتىنىن، ال وتاندىق كومپانيالار جاھاندىق برەندتەردىڭ قاتارىنا قوسىلادى دەگەن ءۇمىتىن ءبىلدىردى.