ۋكراينادا «شاڭىراق» قازاق مەكتەبى قالاي اشىلدى؟
وندا كەلۋشىلەرگە ءتىل مەن قاتار ۇلتتىق سالت-ءداستۇر، ادەت-عۇرىپ جانە ءتول مادەنيەتىمىز دارىپتەلىپ، ۇيرەتەدى. وزگە ەلدەگى قازاق مەكتەبىنىڭ اشىلۋ تاريحى جانە جۇمىس بارىسىمەن تانىسۋ ماقساتىندا قازاقپارات ءتىلشىسى قازاقستاننىڭ حاركوۆ قالاسىنداعى قۇرمەتتى كونسۋلدىڭ كەڭەسشىسى ستەفانيا ريشكومەن سۇحباتتاسقان بولاتىن.
«حاركوۆتەگى قازاق ءتىلى مەكتەبى ۋكرايناداعى قازاقستاننىڭ ەلشىلىگى باستاماسىمەن اشىلدى. دالىرەك ايتقاندا، بۇل يدەيانى بىزگە ۋكرايناداعى قازاقستاننىڭ ەلشىسى دارحان كالەتايەۆ ۇسىندى. الدىمەن قازاق ءتىلىن جەتىك بىلەتىن جانە وزگەگە ۇيرەتە الاتىن مامان ىزدەۋگە كىرىستىك. دايىندىق جۇمىستارى جارتى جىلعا جۋىق ۋاقىت الدى. ناتيجەسىندە قازاق ءتىلىن ۇيرەتەتىن ماماندى تاپتىق، ول وسىنداعى دياسپورانىڭ وكىلى گۋليا سايكو دەگەن قازاق ازاماتى. ول كىسى شىمكەنتتىڭ تۋماسى، ءبىراق ءبىراز جىلدار ۋكراينادا تۇرىپ جاتىر»، - دەدى س. ريشكو.
ونىڭ ايتۋىنشا، حاركوۆ قالاسىنان بولەك، ەل استاناسى كيەۆتە دە ەلشىلىك جانىنان قازاق ءتىلىن ۇيرەتەتىن كۋرس اشىلعان.
«قازاق ءتىلىن ۇيرەنۋگە اسىرەسە بالالاردىڭ قىزىعۋشىلىعى جوعارى. جالپى حاركوۆتە تۇراقتى جانە ۋاقىتشا جۇمىس بابىمەن كەلىپ، تۇرىپ جاتقان قازاقستاندىق وتباسىلار بارشىلىق. ەرەكشە ايتىپ وتەتىن ءسات، بىزگە كەلۋشىلەر قازاق تىلىمەن قاتار ۇلتتىق سالت-ءداستۇر، ادەت-عۇرىپ پەن قازاقي مادەنيەتتى دە ۇيرەنەدى. ۇيرەتۋ ادىسىنە كەلسەك، ازىرگە نەگىزگى كەلۋشىلەر بالالار بولعاندىقتان، ولارعا ءتىلدى ويىن جانە تانىمدىق ءادىس ارقىلى ءسىڭىرىپ جاتىرمىز. ياعني بالالاردىڭ جاس ەرەكشەلىكتەرىنە سايكەس، ارتىق جۇكتەمەسىز ءتاسىل قولدانىلادى. سول سياقتى بالالار قازاق تىلىندە تاقپاق، ولەڭ جاتتايدى. جانە دە ەلشىلىكتىڭ قولداۋىمەن ءتۇرلى مادەني- اعارتۋ ءىس-شارالار ۇيىمداستىرىلادى»، - دەيدى ول.
سونداي-اق، كونسۋل كەڭەسشىسى «شاڭىراق» اتاۋىن العان قازاق ءتىلى مەكتەبىنە كەلەم دەۋشىلەرگە ەسىك ءاردايىم اشىق جانە ساباقتىڭ تەگىن ۇيىمداستىرىلاتىنىن ايتتى.
«ارينە باسىمدىق قازاق ءتىلىن ۇيرەتۋگە بەرىلەدى، دەگەنمەن بۇل شىعارماشىلىق مەكتەپ بولىپ سانالادى. سەبەبى مۇندا بالالار ءان ايتادى، ولەڭ وقيدى، ءتىل ۇيرەنەدى، سول ارقىلى وتاندى سۇيۋگە، قۇرمەتتەۋگە جانە ءوز تاريحىن بىلۋگە باۋليدى. جالپى بولاشاققا جوسپار كوپ. سونىڭ ءبىرى قازاقستاندىق جانە ءبىزدىڭ بالالارمەن بىرلەسكەن ءىس-شارالار وتكىزۋ، سول سياقتى وسىنداعى بالالاردى قازاقستانعا ساياحاتقا الىپ بارۋ. باستى قۋانتاتىنى اتا-انالار مەن بالالاردىڭ قازاق ءتىلىن ۇيرەنۋگە دەگەن ىنتاسى جوعارى. اتا-انالار مەكتەپ اشىلعان كۇننەن باستاپ، بالالارىن الىپ كەلىپ، وزدەرى دە بەلسەندىلىك تانىتىپ جاتىر»، - دەدى ول.