ەل ازاماتتارى پاندەميادا ەكپەنىڭ اسا ماڭىزدى ەكەنىن تۇسىنەدى دەپ ويلايمىن - پرەزيدەنت
23:02, 01 - اقپان 2021
نۇر- سۇلتان. قازاقپارات – ق ر پرەزيدەنتى ەل ازاماتتارى جاپپاي پاندەميا جاعدايىندا ەكپەنىڭ اسا ماڭىزدى جانە قاجەتتى ەكەنىن تۇسىنەتىنىنە سەنىم ءبىلدىردى. بۇل تۋرالى قاسىم- جومارت توقايەۆ Twitter- دەگى پاراقشاسىندا جازدى.
«1-اقپان كۇنى قازاقستاندا COVID-19 ىندەتىنە قارسى جاپپاي ۆاكسينا سالۋ باستالدى. ءبىز ىندەتكە قارسى الەمدىك تاجىريبەنى قولدانىپ وتىرمىز. ۆاكسينا - پاندەميانى جەڭۋدىڭ جالعىز سەنىمدى جولى. ازاماتتاردى ۆاكسينالاۋ شىعىندارىنىڭ بارلىعىن مەملەكەت كوتەرەدى. ۆاكسينا سالۋعا دەنساۋلىعى جارامايتىن ازاماتتاردان باسقالارى، جاپپاي پاندەميا جاعدايىندا ەكپەنىڭ اسا ماڭىزدى جانە قاجەتتى ەكەنىن تۇسىنەدى دەپ ويلايمىن» دەپ جازدى مەملەكەت باسشىسى.
ايتا كەتەيىك، بۇگىن قازاقستاندا كوروناۆيرۋس ينفەكسياسىن جۇقتىرۋ جانە تاراتۋ تاۋەكەلى جوعارى ساناتتاردى كوروناۆيرۋسقا قارسى ۆاكسينالاۋ باستالعانىن حابارلاعان ەدىك.