كوروناۆيرۋستىڭ تارالۋ كورسەتكىشى كوكتەمگە قاراي تومەندەۋى مۇمكىن

ماسكەۋ. تاسس-قازاقپارات - رەسەي فەدەراتسياسىندا كوكتەمدە كوروناۆيرۋس اۋرۋىنىڭ ءوسۋى بولمايدى.

بۇل تۋرالى روسپوترەبنادزور ەپيدەميولوگيا ورتالىق عىلىمي- زەرتتەۋ ينستيتۋتى ديرەكتورىنىڭ عىلىمي جۇمىستار جونىندەگى ورىنباسارى الەكساندر گورەلوۆ ايتتى، دەپ حابارلايدى قازاقپارات تاسس اگەنتتىگىنە سىلتەمە جاساپ.

«كۇزدە ورتاشا ءوسۋ كەزەڭى بولدى، قازىر ەپيدەميالىق پروتسەستى تۇراقتاندىرۋ كەزەڭى وتۋدە، ول ادەتتە ەكى ايعا سوزىلادى. سودان كەيىن كوكتەمدە دە بولاتىن تۇراقتى قۇلدىراۋ كەزەڭى وتەدى. ال كوكتەمدە اۋرۋ دەڭگەيى ءداستۇرلى تۇردە تومەن بولادى. ءبىز مۇنداي يممۋندىق قاباتپەن نولگە تۇسپەيمىز»، - دەدى ول.

الداعى كۇزگى ەپيدەميالىق ماۋسىم تۋرالى سۇراققا جاۋاپ بەرگەن گورەلوۆ «ول تىنىش وتپەيدى» دەپ اتاپ ءوتتى. ونىڭ ايتۋىنشا، تۇماۋدىڭ كەز- كەلگەن ءتۇرى بولعان جاعدايدا، ينفەكسيا ادامدار اراسىندا تارالا باستايدى.

«ءبىز تەك تۇماۋدى باقىلاۋ تۋرالى عانا ايتا الامىز، ول ءۇشىن ۆاكتسينالار بار جانە كوروناۆيرۋستى باقىلاۋعا الۋعا ۇلگەرەمىز دەپ ۇمىتتەنەمىز»، - دەپ ءتۇسىندىردى ساراپشى.

گورەلوۆ سونىمەن قاتار قالادا اۋرۋدىڭ تارالۋ يندەكسى 0,7 دەن از بولعان جاعدايدا عانا كوروناۆيرۋستىق شەكتەۋلەردى الىپ تاستاۋعا بولاتىنىن اتاپ ءوتتى. كوروناۆيرۋس پاندەمياسى باستالعالى الەمدە 102,5 ميلليوننان استام ادام اۋرۋعا شالدىققان. 2,2 ميلليوننان استام ادام كوز جۇمعان. رەسەيدە كوروناۆيرۋسپەن كۇرەس جونىندەگى فەدەرالدى جەدەل شتابتىڭ مالىمەتى بويىنشا اۋرۋ جۇقتىرۋدىڭ 3 850 439 جاعدايى تىركەلگەن، 3300004 ادام ساۋىعىپ شىققان، 73182 ناۋقاس قايتىس بولعان. رەسەي ۇكىمەتى ەلدەگى جاعداي تۋرالى حابارلاۋ ءۇشىن ستوپكوروناۆيرۋس. ر ف رەسۋرسىن ىسكە قوسقان بولاتىن.

اۆتور: اياۋلىم التىنبەك