2020-جىلدىڭ جەلتوقسانىندا فيلترلى سيگارەت باعاسى 1 جىل بۇرىنعىعا قاراعاندا 14,9 پايىزعا قىمباتتادى. تەمەكى باعاسىنىڭ ءوسىمى اتىراۋ (ءبىر جىلدا 20,9 پايىز)، جامبىل (20,3) جانە الماتى وبلىسىنىڭ تۇرعىندارىنا قاتتى سەزىلدى. ەلىمىزدىڭ قالالارىنداعى بازارلار مەن دۇكەندەردە ءبىر قوراپ تەمەكى باعاسى جەلتوقساندا 508 تەڭگەگە جەتتى.
2020-جىلدىڭ 11 ايىنىڭ قورىتىندىسىندا جەرگىلىكتى كومپانيالار ىشكى نارىقتاردى تەمەكى جانە پاپيروسپەن 75,2 پايىزعا قامتاماسىز ەتتى.
ال 2019-جىلى بۇل كورسەتكىش نەبارى 30,9 پايىزدى قۇراعان بولاتىن. اتالعان كەزەڭ ىشىندە ءوندىرىس كولەمى 2,5 پايىزعا تومەندەگەنىنە قاراماستان يمپورت بىردەن 7 ەسەگە، 5 ميلليارد داناعا دەيىن قىسقاردى.
ەكسپورت ۇلەسى 2,7 ميلليارد سيگارەت پەن پاپيروستى قۇرادى. ەل تۇرعىندارى 11 ايدا 17,6 ميلليارد دانا تەمەكى شەكتى. بۇل رەتتە شىلىمقورلاردىڭ ۇلەسى ءبىر جىل بۇرىنعى كورسەتكىشكە قاراعاندا بىردەن 32,9 پايىزعا ازايىپ وتىر.
2020-جىلدىڭ قاڭتار-قاراشاسىندا ءاربىر ەرەسەك قازاقستاندىق 1,5 مىڭ دانا سيگارەت پەن پاپيروس نەمەسە كۇنىنە 4,4 دانا تەمەكى شەككەن. ۇلتتىق ستاتيستيكا بيۋروسىنىڭ مالىمەتتەرىنە سايكەس، 2020-جىلدىڭ قاڭتار-قاراشاسى ارالىعىندا سيگارەتتىڭ ورتاشا باعاسى قورابىنا 477 تەڭگە بولدى. ءبىر قوراپتا 20 سيگارەت بولعان كەزدە 11 ايدا ءاربىر قازاقستاندىق ورتاشا ەسەپپەن 73 قوراپ تەمەكى ساتىپ الىپ، وعان 34,8 مىڭ تەڭگە جۇمساعان.