قازاقستاندا كوروناۆيرۋسقا قارسى ۆاكسيناتسيا باستالدى
مامانداردىڭ ايتۋىنشا، كوروناۆيرۋستى توقتاتىپ، پاندەميادان شىعۋدىڭ بىردەن-ءبىر جولى - ۆاكسينالاۋ بولىپ وتىر. قازاقستاندا ۆاكسينا ەرىكتى تۇردە سالىنادى.
«حالىق دەنساۋلىعى جانە دەنساۋلىق ساقتاۋ جۇيەسى تۋرالى» ق ر كودەكسىنىڭ 77-بابىنا سايكەس، كەز كەلگەن مەديتسينالىق ەم-شارا، ونىڭ ىشىندە ۆاكسيناتسيا ەگىلەتىن ادامنىڭ كەلىسىمىمەن عانا جۇرگىزىلەدى. قازاقستاندا ۆاكسيناتسيادان باس تارتقانى ءۇشىن اكىمشىلىك نەمەسە قىلمىستىق جاۋاپكەرشىلىك كوزدەلمەگەن، كەز كەلگەن قىسىم كورسەتۋ زاڭسىز بولىپ تابىلادى.
1- اقپاننان باستاپ قازاقستاندا رەسەيدە شىعارىلعان «سپۋتنيك V» ۆاكسيناسىن پايدالانا وتىرىپ، ك ۆ ي- عا قارسى ۆاكسيناتسيا باستالادى. ودان كەيىن 15- اقپاننان باستاپ، ۆاكسينالاۋ پروتسەسىنە قاراعاندى فارماتسيەۆتيكالىق كەشەنىنىڭ بازاسىندا وندىرىلگەن گام-كوۆيد-ۆاك ۆاكسيناسى قوسىلادى. ال 2021-جىلدىڭ 2- توقسانىنان باستاپ ۆاكسينالاۋ پروتسەسىنە وتاندىق - QazCovid-In پرەپاراتىن قوسۋ جوسپارلانىپ وتىر.
بۇل ۆاكسينا قازىرگى ۋاقىتتا كلينيكالىق سىناقتىڭ 3-كەزەڭىنەن وتۋدە.
31- قاڭتاردا قاراعاندى فارماتسيەۆتيكالىق كەشەنى ەلگە «سپۋتنيك V» ۆاكسينالارىنىڭ العاشقى پارتياسىن جەتكىزدى. اقپان ايىندا قاراعاندى فارماتسيەۆتيكالىق كەشەنى ۆاكسينانىڭ 112 مىڭ دوزاسىن، ناۋرىزدا - 150 مىڭ دوزا، ساۋىردەن ماۋسىمعا دەيىن - اي سايىن 600 مىڭ دوزادان جەتكىزەتىن بولادى. سونداي-اق ءساۋىر ايىنان باستاپ 75 مىڭ دوزا كولەمىندە QazCovid-in وتاندىق ۆاكسيناسىن ەگۋ جانە ونى اي سايىن 500 مىڭ دوزاعا دەيىن ۇلعايتۋ جوسپارلانىپ وتىر.
ۆاكسيناتسيا پرەپاراتتىڭ كەلىپ تۇسۋىنە بايلانىستى كەزەڭ-كەزەڭمەن جۇزەگە اسىرىلادى. ءبىرىنشى كەزەڭدە جۇقپالى اۋرۋلار اۋرۋحانالارىنىڭ، جەدەل مەديتسينالىق كومەك، رەانيماتسيا، م س ا ك، قابىلداۋ بولمەلەرىنىڭ مەديتسينا قىزمەتكەرلەرى، سانەپيدقىزمەت ماماندارى ەگىلەدى. ەكىنشى كەزەڭدە جالپى ءبىلىم بەرەتىن مەكتەپتەردىڭ، جوعارى وقۋ ورىندارىنىڭ پەداگوگتارى، ءبىرىنشى كەزەڭگە كىرمەگەن مەديتسينالىق قىزمەت ماماندارى ۆاكسيناتسيالانادى.
ءۇشىنشى كەزەڭدە مەكتەپ-ينتەرناتتاردىڭ، مەكتەپكە دەيىنگى مەكەمەلەردىڭ پەداگوگتارى، ستۋدەنتتەر مەن سوزىلمالى اۋرۋلارى بار ادامدار قامتىلادى. بۇدان باسقا، حالىقتىڭ قوسىمشا وسال توپتارى: ت ج م، ءى ءى م، قورعانىس مينيسترلىگى، ۇ ق ك، مەملەكەتتىك كۇزەت قىزمەتىنىڭ قىزمەتكەرلەرىن جانە باسقالاردى قوسا وتىرىپ، كونتينگەنتتى كەڭەيتۋ جوسپارلانۋدا.
كوروناۆيرۋسقا قارسى ۆاكسينانى 21 كۇندىك ارالىقپەن ەكى كەزەڭمەن ەنگىزۋ كەرەك. ءبىرىنشى دوزا انتيدەنەلەردىڭ از مولشەرىن وندىرۋگە بايلانىستى قىسقا قورعانىس اسەرىن بەرەدى. ەكىنشى دوزا ءبىرىنشىسىنىڭ اسەرىن كۇشەيتەدى جانە نىعايتادى، ادام ورگانيزمىندەگى انتيدەنەلەر سانى ارتادى.
ۆاكسيناتسيا جۇرگىزەر الدىندا دەنە تەمپەراتۋراسى ولشەنەدى، ەپيدەميولوگيالىق انامنەزدى جيناۋ، ساتۋراتسيانى، جۇرەك جيىرىلۋىنىڭ جيىلىگىن، ارتەريالىق قىسىمدى ولشەۋ، تىنىس الۋ جانە جۇرەك- قانتامىر جۇيەسىن اۋسكۋلتاتسيالاۋ جانە جۇتقىنشاقتى تەكسەرۋ شارالارى جاسالادى. ەگەر تەمپەراتۋرا 37 گرادۋستان اسسا، ۆاكسيناتسيا كەيىنگە قالدىرىلادى.
رەسەيلىك سپۋتنيك V ۆاكسيناسى بويىنشا قارسى كورسەتىلىمدەر:
انامنەزدەگى اۋىر اللەرگيالىق رەاكسيالار، جۇكتىلىك جانە بالا ەمىزۋ كەزەڭدەرى، 18 جاسقا دەيىنگى بالالار جانە 65 جاستان اسقان قارتتار.
باۋىر مەن بۇيرەكتىڭ سوزىلمالى اۋرۋى بارلارعا، قانت ديابەتى سىندى ەندوكريندىك جۇيەنىڭ ايقىن بۇزىلىسى بايقالعاندارعا ساقتىقپەن قولدانۋ قاجەت. قان ءتۇزىلۋ جۇيەسىنىڭ اۋىر سىرقاتتارىندا، ەپيلەپسيا، ينسۋلت جانە ورتالىق جۇيكە جۇيەسىنىڭ باسقا اۋرۋلارىندا، جۇرەك-قانتامىر جۇيەسى دەرتتەرىندە، باستاپقى جانە قايتالاما يممۋن تاپشىلىعى مەن اۋتويممۋندى، سونداي-اق، دەمىكپە جانە سوزىلمالى وبسترۋكتيۆتى وكپە اۋرۋلارىندا ساقتىق تانىتۋ قاجەت.
ديابەتپەن جانە مەتابوليكالىق سيندروم، اتوپيا مەن ەكزەما اللەرگيالىق رەاكسيالارى، سونداي-اق قاتەرلى ىسىك، قاتەرلى قان اۋرۋلارى بار ناۋقاستارعا ۆاكسينا سالاردا اعزا جاعدايىن جەكەلەي قاراستىرۋ كەرەك.
ياعني، بۇل جاعدايلار ابسوليۋتتى قارسى كورسەتىلىمدەرگە جاتپايدى جانە ۆاكسينالاۋ كەزىندە ءار ناۋقاستىڭ جاعدايىنا قاراي بايلانىستى دەربەس تاعايىندالۋى ءتيىس. تەگىن مەديتسينالىق كومەكتىڭ كەپىلدىك بەرىلگەن كولەمى اياسىندا قازاقستاندىقتارعا كوروناۆيرۋسقا قارسى ەگۋ تەگىن جۇرگىزىلەدى.
ۇكىمەت رەزەرۆىنەن ءتيىستى قاراجات بولىنەدى. دەنساۋلىق ساقتاۋ مينيسترلىگىنىڭ ۇسىنىمدارىنا سايكەس، COVID- پەن اۋىرىپ ساۋىققاننان كەيىن ۆاكسيناتسيا 6 ايدان ەرتە جۇرگىزىلمەۋى قاجەت. كوروناۆيرۋسپەن اۋىرعان ادامنىڭ انتيدەنەلەر ءتيترى جوعارى بولسا جانە ۇزاق ۋاقىت ساقتالسا، ۆاكسينا سالۋدىڭ قاجەتى جوق. ال ەگەر انتيدەنە ءتيترى ۋاقىت وتە كەلە تومەندەسە نەمەسە ءتورتىنشى، التىنشى ايدا نولگە دەيىن تۇسسە، وندا يممۋنداۋ ماسەلەسى تۋىنداۋى مۇمكىن.
ق ر دەنساۋلىق ساقتاۋ مينيسترلىگىنىڭ باسشىلىعى دا ۆاكسينانى العاشقىلاردىڭ قاتارىندا سالدىرادى.
بۇگىن ەلورداداعى 6№ قالالىق ەمحانادا ق ر دەنساۋلىق ساقتاۋ ۆيتسە-ءمينيسترى - باس مەملەكەتتىك سانيتار دارىگەر ەرلان قياسوۆ پەن دەنساۋلىق ساقتاۋ ۆيتسە-ءمينيسترى اجار عينيات Sputnik V ۆاكسيناسىن سالدىرادى. ال دەنساۋلىق ساقتاۋ ءمينيسترى الەكسەي سوي قازاقستاندىق QazCovid-in ۆاكسيناسىن سالدىرۋدى جوسپارلاپ وتىر.
26- قاڭتاردا ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ تا كوروناۆيرۋسقا قارسى قازاقستاندىق ۆاكسينانى سالدىراتىنىن مالىمدەگەن ەدى. ۆاكسينالاۋ تۋرالى تولىق اقپاراتتى قازاقپارات اگەنتتىگىنىڭ ارنايى ايدارىنان وقۋعا بولادى.