قازاقستاندىق عالىم كوروناۆيرۋستى جىلدام انىقتايتىن ەكسپرەسس تەست ويلاپ تاپتى
بۇگىندە ەكسپرەسس تەست زەرتحانالىق سىناقتان ءساتتى ءوتىپ، ەندىگى ۋاقىتتا كلينيكالىق سىناۋدان وتكىزىلەتىن بولادى. وسى ورايدا جەرلەسىمىز ەكسپرەسس تەستتىڭ قالاي جانە قانشا ۋاقىت ىشىندە ازىرلەگەنى تۋرالى قازاقپارات تىلشىسىنە ايتىپ بەردى.
«پاندەميا ەتەك جايىپ، كوروناۆيرۋس ىندەتىنەن ادامدار قايتىس بولا باستاعاندا، ماعان ىندەتتى انىقتايتىن قۇرىلعى ويلاپ تابۋ يدەياسى كەلدى. سەبەبى ادامدار پ ت ر تەستتىڭ ناتيجەسىن ۇزاق كۇتۋگە تۋرا كەلدى، سالدارىنان ىندەتتىك جاعداي ءورشي ءتۇستى. وسى ورايدا مەن ءبىر ارەكەت جاساۋ كەرەك دەگەن شەشىمگە كەلدىم. كوروناۆيرۋس ىندەتىن انىقتايتىن ەكسپرەسس تەستتى ازىرلەۋگە 6 اي ۋاقىتىم كەتتى. جانە ونى سالا عالىمدارىنىڭ كەڭەسىنە سۇيەنە وتىرىپ، تولىقتاي ءوزىم ازىرلەپ شىقتىم. وعان دەيىن نانودەنە تەحنولوگياسى تۋرالى بىلەتىنمىن، سول تەحنولوگيانى تابۋ ماقساتىندا شەتەلدىك عالىمداردان سۇراستىرا باستادىم. ولاردىڭ قاتارىندا يزرايل، ا ق ش، يران، شۆەيتساريا عالىمدارى بار. سونىڭ ىشىندە شۆەيتساريالىق عالىمدار سۇراۋىمدى قاناعاتتاندىرىپ، كوروناۆيرۋسقا قارسى نانودەنە تەحنولوگياسىن ماعان جىبەردى. سول تەحنولوگياعا سۇيەنە، قولدانا وتىرىپ مەن اتالعان ىندەتتى جىلدام انىقتايتىن تەست ويلاپ شىعاردىم»، - دەدى ب. سۇلتانقۇلوۆ.
ونىڭ ايتۋىنشا، كوروناۆيرۋستى انىقتايتىن ەكسپرەسس تەست زەرتحانالىق جاعدايدا ازىرلەندى.
«باعاسىنا كەلسەك، مەن ازىرلەگەن تەست پ ت ر جانە انتي دەنە تەستتەرىنە قاراعاندا ارزانداۋ بولادى. دەگەنمەن ناقتى باعاسىن ءدال قازىر ايتا المايمىن، سەبەبى ول ءالى ەسەپتەلىپ جاتىر. قارجىلاندىرۋ ماسەلەسى تۋرالى ايتار بولسام، مەنىڭ بۇل جاڭالىعىما نازاربايەۆ ۋنيۆەرسيتەتى قارجىلاي گرانت ءبولدى. ەندىگى كەزەكتى ەكسپرەسس تەستتى نارىققا شىعارماس بۇرىن ساراپتامادان جانە ساپاسىن دالەلدەيتىن تەكسەرىستەن وتكىزۋ كەرەك»، - دەيدى ول.
سونداي- اق، عالىم ەكسپرەسس تەستتىڭ تيىمدىلىگى تۋرالى ايتتى.
«دەگەنمەن COVID-19 ىندەتىن جىلدام انىقتايتىن بۇل تەست كلينيكالىق سىناۋدان وتكەن جوق. ءبىراق وتكىزەتىن بولامىز، ول ءۇشىن بىزگە دەنساۋلىق ساقتاۋ مينيسترلىگىنىڭ قولداۋى قاجەت. بۇل تەست بارلىق جاستاعى ادامدار ءۇشىن قاۋىپسىز. ول ءۇشىن ادامنىڭ سىلەكەيى قولدانىلادى. مەنىڭ ويىمشا، بۇل تەستتىڭ تيىمدىلىگى سول، كوروناۆيرۋس سيمپتومى بايقالعان ساتتەن باستاپ 7 كۇننىڭ ىشىندە انىقتايدى. ال سيپمتومسىز جاعدايدا تەستتىڭ ادام اعزاسىنا قالاي اسەر ەتەتىنى ازىرگە بەلگىسىز. ونى الداعى زەرتتەۋ بارىسىندا انىقتايتىن بولامىز. جانە ەكسپرەسس تەست كوروناۆيرۋستى زەرتحانالىق جاعدايدا ناقتى ءارى جىلدام انىقتايدى. ەڭ باستى ەرەكشەلىگى، ول ارزان تۇرادى ياعني ونى تەز ءارى ۇلكەن كولەمدە وندىرىسكە شىعارۋ مۇمكىندىگى بار. بۇگىنگى تاڭدا وندىرىسكە شىعارۋ ماسەلەسى دە تالقىلانىپ جاتىر»، - دەدى مامان.