قازاقپارات ءتىلشىسى سپورت تاقىرىبىنداعى بايقاۋ جەڭىمپازى اتاندى

نۇر-سۇلتان. قازاقپارات - قازاقستان تەننيس فەدەراتسياسى ۇيىمداستىرعان بايقاۋدا قازاقپارات ءتىلشىسى ۇزدىك دەپ تانىلدى.

بايقاۋ قورىتىندىسى اتالعان فەدەراتسيا سايتىندا جاريالاندى، دەپ حابارلايدى قازاقپارات.

ايتا كەتەرلىگى، قازاقستان تەننيس فەدەراتسياسى 2020 -جىلدىڭ 31-جەلتوقسانى مەن 2021 -جىلدىڭ 17-قاڭتارى ارالىعىندا قازاقستاندىق تەننيس تۋرالى وتكەن جىلى جاريالانعان ەڭ قىزىقتى ماتەريالدار بايقاۋىنا ءوتىنىم قابىلداعان بولاتىن.

بايقاۋعا كاسىبي تىلشىلەر مەن جاس جۋرناليستەر، بلوگەرلەر مەن تەننيس جانكۇيەرلەرى ماتىندىك ماتەريالدارىن، ۆيدەوسيۋدجەتتەرىن، فوتورەپورتاجدارىن جىبەرگەن. قورىتىندىسىندا قازاق تىلىندەگى ۇزدىك ماتەريال اتالىمىندا قازاقپارات ءتىلشىسى عايساعالي سەيتاق جەڭىمپاز بولدى.

ال ورىس تىلىندە جارىق كورگەن ماتەريالدار اتالىمىندا inbusiness.kz ءتىلشىسى دميتري پوكيدايەۆ ۇزدىك دەپ تانىلدى.

ورىس تىلىندەگى ۇزدىك ۆيدەو سيۋجەت سىيلىعى «حابار 24» پەن «Qazaq TV» ءتىلشىسى مارات تۇقاتوۆقا بۇيىردى. ۇزدىك فوتورەپورتاج سىيلىعى اندرەي ۋدارسيەۆكە تابىستالدى. بايقاۋدىڭ قالعان قاتىسۋشىلارىنا الەمنىڭ ءبىرىنشى راكەتكاسى نوۆاك دجوكوۆيچتىڭ ءومىرباياندىق كىتابى ىنتالاندىرۋ سىيلىعى رەتىندە بەرىلدى.

اۆتور: مارلان جيەمباي