ق ر د س م سانيتاريالىق- ەپيدەميولوگيالىق باقىلاۋ كوميتەتىنىڭ ۆاكسيناعا كونەتىن ينفەكسيالاردى باقىلاۋ باسقارماسىنىڭ باسشىسى نۇرشاي ازىمبايەۆا:
«ۆاكسينالاۋدىڭ ماڭىزى تۋرالى ايتا كەتكىم كەلەدى. ۆاكسينالاۋ - ىندەتكە قارسى تۇرۋدىڭ، ادامداردى كوروناۆيرۋس قاۋپىنەن ساقتاندىرۋدىڭ ەڭ وزىق امالدارىنىڭ ءبىرى. ەكپە ساۋ ادامدارعا سالىناتىندىقتان، حالىق اراسىندا قازىر ەگىلەتىن پرەپاراتقا كۇمانمەن قارايتىندار دا بار. ول تۇسىنىكتى. ساۋ ادامعا ۆاكسينا سالىنعاننان كەيىن ونىڭ بويىنان جاعىمسىز اسەرلەر بايقالسا، البەتتە، حالىق ودان قورقا باستايدى. بۇل رەتتە ينفەكسيانىڭ اسا ءبىر ۇرەيلى كەزەڭدەرى وتكەندەي بولعاندىقتان، حالىق ونىڭ قاۋپىنەن گورى ۆاكسينانىڭ جاعىمسىز اسەرىنە كوبىرەك نازار اۋدارۋدا»، - دەدى نۇرشاي ازىمبايەۆا.
باسقارما باسشىسى مىسالعا پوليوميەليت اۋرۋىن كەلتىردى.
«بۇرىن اتالارىمىز بەن اجەلەرىمىزگە ۆاكسينانىڭ نەلىكتەن كەرەكتىگىن ءتۇسىندىرۋدىڭ ءوزى دە ارتىق بولاتىن. ويتكەنى ءار اۋىلدا پوليوميەليتپەن اۋىراتىن ادامدار كوپ ەدى. بۇل اۋرۋعا شالدىققاندار ورنىنان قوزعالا الماي، قوزعالا الاتىندارى قولىنا تاياق ۇستاپ ارەڭ جۇرەتىن. قىزىلشادا دا سول. ءبىر ۇيدە 10-15 بالا بولعان كەزدەردە قىزىلشاعا شالدىعىپ، اجالدىڭ سودان كەلەتىن جاعدايى دا كوپ بولعان. وعان قارسى ۆاكسينا پايدا بولعان كەزدە ادامدار ويلانعان جوق - بىردەن ەكپە الدى. سەبەبى ۆاكسينانىڭ جاعىمسىز اسەرىنەن گورى اۋرۋدىڭ ءوزى نەشە ەسە قاۋىپتى ەكەنىن جاقسى تۇسىنەتىن. بۇرىن قاۋىپتى بولعان سول ينفەكسيالار قازىر «شەگىندى». ولار دا ءبىر كەزدەرى كوروناۆيرۋس سەكىلدى جۇرتتىڭ ۇرەيىن ۇشىراتىن. سوندىقتان سول ينفەكسيالار ۆاكسينالار ارقىلى جويىلعانىن ەسكە سالامىز»، - دەدى نۇرشاي ازىمبايەۆا.
ەسكە سالا كەتسەك، بۇعان دەيىن نۇرشاي ازىمبايەۆا اقىلى ەكپە كابينەتتەرىندە ك ۆ ي-گە قارسى ۆاكسينا سالىنبايتىنىن ەسكەرتكەن ەدى.