جەزقازعاندا قازا تاپقان تۇرعىننىڭ تەلەفونىنان كرەديت راسىمدەگەن پوليتسەيلەر سوتتالدى

جەزقازعان. قازاقپارات - جول-كولىك وقيعاسىنان قازا بولعان جۇرگىزۋشىنىڭ ۇيالى تەلەفونىن ۇرلاعان ەكى پوليتسەي سوتتالدى.

جەزقازعان قالالىق سوتى ۇرلىق، لاۋازىمدىق وكىلەتتىكتەرىن اسىرا پايدالانۋ جانە الاياقتىق جاسادى دەگەن ايىپپەن ۇستالعان بۇرىنعى ءتارتىپ ساقشىلارىنا ۇكىم شىعاردى، دەپ حابارلايدى قازاقپارات ءتىلشىسى.

وتكەن جىلدىڭ كوكتەمىندە جەرگىلىكتى پوليتسيا باسقارماسىنىڭ ەكى كريميناليستى جول اپاتى بولعان جەزقازعان - ساتبايەۆ جولىنا شاقىرتىلعان. وقيعا ورنىندا پوليتسيا قىزمەتكەرلەرى قازا تاپقان جۇرگىزۋشىنىڭ ۇيالى تەلەفونىن تاۋىپ العان. ونى زاتتاي دالەل رەتىندە تاپسىرۋدىڭ ورنىنا پوليتسەي تەلەفوندى الىپ كەتكەن. كەيىن موبيلدىك قوسىمشا ارقىلى تەلەفون يەسىنىڭ اتىنا ميكروكرەديتتەر رەسىمدەگەن.

سوڭىرا شوتقا تۇسكەن اقشانى دوسىنىڭ كارتاسىنا اۋدارعان. ءبىراز ۋاقىتتان كەيىن ولاردىڭ الاياقتىق ارەكەتى انىقتالدى. كۇدىكتىلەر پروكۋرورمەن ءىس جۇرگىزۋ كەلىسىمىن جاساپ، ءوز كىناسىن تولىق مويىندادى.

جەزقازعان قالالىق سوتى ولاردى 3,6 جىلعا باس بوستاندىعىن شەكتەۋ تۋرالى ۇكىم شىعاردى.

سونداي-اق، سوت ولاردى ارناۋلى اتاعىنان ايىردى.

«باياندالعاندى نەگىزگە الا وتىرىپ، سوت سوتتالۋشىلاردى كىنالى دەپ تانىدى جانە ءبىرىنشى سوتتالۋشىعا 3 جىل 6 اي باس بوستاندىعىن شەكتەۋ تۇرىندەگى جازا تاعايىندادى. بۇل رەتتە ول ءومىر بويى مەملەكەتتىك قىزمەتتە جۇمىس ىستەۋ قۇقىعىنان، سونداي-اق پوليتسيا لەيتەنانتى ارناۋلى اتاعىنان ايىرىلدى. ەكىنشى سوتتالۋشىعا پوليتسيا اعا لەيتەنانتى ارناۋلى اتاعىنان ايىرا وتىرىپ، 3 جىل 6 اي باس بوستاندىعىن شەكتەۋ جازاسى تاعايىندالدى. ۇكىم زاڭدى كۇشىنە ەندى»، - دەدى جەزقازعان قالالىق سوتىنىڭ باسپا ءسوز قىزمەتى.