جەكە كاسىپكەرلىكتى بانك قوسىمشالارى ارقىلى اشۋعا بولادى

جەكە كاسىپكەرلىكتى اشۋ ءۇشىن جەكە تۇلعادان دارا كاسىپكەر رەتىندە قىزمەتتىڭ باستالعانى تۋرالى حابارلاما جىبەرۋ جەتكىلىكتى.

«بۇدان بىلاي قازاقستاندىقتار Halyk Bank ءموبيلدى قوسىمشاسىندا ىسكە اسىرىلعان جاڭا سەرۆيستىڭ كومەگىمەن ۇيدەن شىقپاي- اق جەكە كاسىپكەرلىكتى تىركەي الادى. وسىعان دەيىن بۇل حابارلامانى www.egov.kz ەلەكتروندىق ۇكىمەت پورتالىندا، سونداي- اق Kaspi.kz قوسىمشاسىندا جىبەرۋ مۇمكىندىگى بولعان»، - دەلىنگەن ق ر ق م مەملەكەتتىك كىرىستەر كوميتەتى باسپا ءسوز قىزمەتىنىڭ مالىمەتىندە. حابارلامانى Halyk Bank قوسىمشاسىندا بىرنەشە باتىرمانى باسۋ ارقىلى جىبەرۋگە بولادى.

«ج ك بولۋ» سىلتەمەسى بويىنشا وتسە جەتكىلىكتى. ودان كەيىن، جۇيە الداعى قادامداردى ۇسىنادى. سونداي- اق، جەكە كاسىپكەرلىكتى اشۋدىڭ بارلىق پروتسەسى 5 مينۋتتان اسپايدى. ەسكەرە كەتەتىن جايت، نىساندى تولتىرۋ كەزىندە جەكە تۇلعا قىزمەتتى جۇزەگە اسىرۋدى جوسپارلاپ وتىرعان وبلىستىڭ مەملەكەتتىك كىرىستەر ورگانىنىڭ كودىن، دارا كاسىپكەردىڭ اتاۋىن، مەكەنجايىن، جۇزەگە اسىرىلاتىن قىزمەت ءتۇرىن، سونداي- اق سالىق سالۋ رەجيمىن تاڭداۋى كەرەك. حابارلاماعا جەكە تۇلعانىڭ ەلەكتروندى سيفرلىق قولتاڭباسىمەن قول قويۋ كەرەك. كەلەسى كۇنى جەكە كاسىپكەر رەتىندە تىركەۋدى مەملەكەتتىك كىرىستەر كوميتەتىنىڭ www.kgd.gov.kz سايتىندا تەكسەرۋگە بولادى.