ءماجىلىستىڭ ىرىكتەلگەن جاڭا دەپۋتاتتارى جايلى قازاقستان ستراتەگيالىق زەرتتەۋلەر ينستيتۋتى اقپاراتتىق-تالداۋ جۇمىسى ءبولىمى باسشىسىنىڭ ورىنباسارى الماس ارزىقۇلوۆ وسىنداي پىكىر ءبىلدىردى، دەپ حابارلايدى قازاقپارات ءتىلشىسى.
«بۇگىن پارتيالار جەڭىپ العان ورىندارىنا قاراي كىمدەر دەپۋتات بولاتىنىن جاريا ەتتى. ءۇش پارتيانىڭ قاي-قايسىسىن الساق تا، قۇرامى 70 پايىزعا جاڭارعانىن كورىپ وتىرمىز. قازاقستان حالىق پارتياسى بولسىن، اق جول نەمەسە Nur Otan بولسىن قۇرامى ءبىرشاما وزگەرگەن، پرەزيدەنت تاپسىرعان كۆوتا دەڭگەيى ساقتالعان»، - دەدى الماس ارزىقۇلوۆ قازاقپارات تىلشىسىنە تەلەفون ارقىلى بىلدىرگەن پىكىرىندە.
ونىڭ ايتۋىنشا، Nur Otan پارتياسىنان ۇسىنىلعان دەپۋتاتتاردىڭ ىشىندە بارلىق سالانىڭ وكىلدەرى بار.
«ولاردىڭ ىشىندە مەملەكەتتىك قىزمەتتە جۇمىس ىستەگەن ازاماتتار، ءبىلىم مەن دەنساۋلىق ساقتاۋ، ونەركاسىپ سالاسىنان دا، ۇكىمەتتىك ەمەس ۇيىمداردان دا شىققان ادامدار بارشىلىق. بۇل جەردەگى باسا نازار اۋداراتىنى - Nur Otan پارتياسى جاستار مەن ايەلدەردىڭ 30 پايىزدىق كۆوتا بويىنشا تاپسىرماسىن ورىنداپ وتىر. ودان بولەك جاڭا كوزقاراستاعى ازاماتتاردىڭ كەلگەنىن ايتۋعا بولادى. مەنىڭ ويىمشا، ءماجىلىس ەندى بۇرىنعى فورماتتا جۇمىس ىستەمەيدى. جاڭا ادامدار جاڭا كوزقاراسپەن، جاڭا يدەيامەن، جاڭا جوبالارىمەن كەلەدى. ولار ساياساتتى بۇرىنعىدان قاراعاندا باسقاشا جۇرگىزەدى دەگەن ويدامىن»، - دەيدى ساراپشى.
ول ۇلتتىق كەڭەس مۇشەلەرى قاتارىنان كەلگەن ازاماتتاردىڭ ماجىلىستەگى جۇمىس انىق بايقالار دەپ ءۇمىت ءبىلدىردى.
«ۇلتتىق كەڭەس مۇشەلەرى قوعامنىڭ وزەكتى ماسەلەلەرىنىڭ شەشىمىن ەندى دەپۋتات رەتىندە تابۋعا تالپىنارى انىق. جاڭا پارلامەنتتىڭ تاعى ءبىر ەرەكشەلىگى - جاڭادان كەلگەن تۇلعالارمەن قاتار، بۇگىن ساياساتتا جۇرگەن، ءتىسقاققان ساياساتكەرلەردىڭ دە قالۋى. تۇگەلىمەن اۋىسىپ كەتسە، كەي جاعدايدا جول سىلتەيتىن، تۇزەتەتىن ادامدار قالماس ەدى. ساياساتتا جۇرگەن ءبىراز ازاماتتار ءماجىلىس ساپىندا قالدى»، - دەدى ول.
ەسكە سالا كەتسەك بۇگىن «Nur Otan» پارتياسى ساياسي كەڭەسى بيۋروسىنىڭ شەشىمىمەن 76 كانديداتتان تۇراتىن ءتىزىم بەكىتىلگەن بولاتىن. دەپۋتاتتىققا كانديداتتاردىڭ 7 ءۋى عانا بۇرىنعى مەملەكەتتىك قىزمەتكەر، ياعني فراكسيا قۇرامىندا ولاردىڭ سانى تەن اسپايدى.