بۇل تۋرالى قازاقپارات ق ر اقپارات جانە قوعامدىق دامۋ مينيسترلىگىنىڭ سايتىنا سىلتەمە جاساپ حابارلايدى. ءىس- شارا جاستىق توپتاردىڭ الەۋمەتتىك- پسيحولوگيالىق ەرەكشەلىكتەرىن ەسكەرەتىن «رۋحاني جاڭعىرۋ» باعدارلاماسىنىڭ جاڭا ادىستەمەلەرىن جۇزەگە اسىرۋ اياسىندا ءوتىپ وتىر.
وتىرىسقا ەل ايماقتارىنىڭ ءبىلىم جانە تاربيە بەرۋ سالاسىندا قىزمەت ەتىپ جۇرگەن ۇيىمداردىڭ باسشىلارى، قوعام قايراتكەرلەرى، مۇعالىمدەر، تەلەارنالاردىڭ جەتەكشىلەرى قاتىستى.
اتالعان جوبا وسكەلەڭ ۇرپاقپەن تاربيەلىك جۇمىستى جۇرگىزۋ پرينتسيپتەرىن جۇيەلەۋ ءۇشىن «رۋحاني جاڭعىرۋ» باعدارلاماسىنىڭ اياسىندا جۇزەگە اسىرىلاتىن بولادى.
«رۋحاني جاڭعىرۋ» باعدارلاماسىنىڭ قۇندىلىقتارىن جان- جاقتى ءتۇسىنۋىن ەسكەرەتىن شارالاردىڭ ماڭىزدى بولىگى رەتىندە مەكتەپكە دەيىن جانە مەكتەپ جاسىنداعى بالالاردى رۋحاني تۇرعىدا تاربيەلەۋ بويىنشا وقۋ- ادىستەمەلىك قۇرالداردى ازىرلەۋ بولماق.
مينيستر ايدا بالايەۆا: «جالپى بۇل تاقىرىپ - كوپتەن بەرى كوكەيدە جۇرگەن ماسەلەلەردىڭ ءبىرى. وزدەرىڭىز بىلەسىزدەر، ءبىزدىڭ مينيسترلىك «رۋحاني جاڭعىرۋ» باعدارلاماسىن جۇزەگە اسىرۋدى ۇيلەستىرۋشى ورگان. سونىمەن قاتار، قوعامنىڭ جالپى جان- جاقتى دامۋىنا قاتىستى ۇيىمداستىرۋ جۇمىستارىن اتقارادى. قوعامدى دامىتۋ دەگەنىمىز نە؟ ول ەڭ ءبىرىنشى ارينە - وسكەلەڭ ۇرپاقتى تاربيەلەۋ ىسىنەن باستاۋ الادى. بالا تاربيەسى - قاشاندا قوعام ءۇشىن ماڭىزدى ماسەلە. جاسىراتىنى جوق، بۇگىنگى كۇنگى بالالاردىڭ تاربيەسىنە، ولاردىڭ وي قالىپتاستىرۋىنا اسەر ەتەتىن سىرتقى فاكتورلار وتە كوپ. سونىڭ ىشىندە اسىرەسە، ۆيرتۋالدى الەمنىڭ، باقىلاۋدان تىس ينتەرنەتتىڭ ىقپالى وتە زور بولىپ تۇر. سوندىقتان ۋاقىت - ۇرپاق تاربيەسىنە جاڭا قىرىنان قاراۋدى تالاپ ەتىپ وتىر. قازىر، وكىنىشكە قاراي، بالالار اراسىندا قاتىگەزدىككە بەيىمدىك، سۋيتسيد، توزىمدىلىكتىڭ تومەندىگى سياقتى ءتۇرلى كەلەڭسىزدىكتەر كەزدەسەدى»، - دەدى.
سونىمەن قاتار، مينيستر بۇل سۇراق كەشەندى زەرتتەۋدى قاجەت ەتەتىندىگىن جانە قوعام ءۇشىن بالا تاربيەسىندە اتا- انامەن بىرگە بالا- باقشا، مەكتەپتەردىڭ دە جاۋاپكەرشىلىگى وتە ۇلكەن ەكەندىگىن اتاپ ءوتتى.
«سوندىقتان، بۇل جوبانى ءبىز ءبىلىم جانە عىلىم مينيسترلىگىمەن بىرلەسىپ جۇزەگە اسىرامىز دەگەن ۇمىتتەمىز»، - دەدى ايدا بالايەۆا.
شاراعا قاتىسۋشىلاردى ستراتەگيامەن «رۋحاني جاڭعىرۋ» قازاقستاندىق قوعامدىق دامۋ ينستيتۋتى باسقارما ءتوراعاسىنىڭ ورىنباسارى اسەم قايداروۆا تانىستىردى. ول، ءوز سوزىندە، قۇجاتتا «رۋحاني جاڭعىرۋ» باعدارلاماسىنىڭ قۇندىلىقتارىن وقۋشىلاردىڭ تەرەڭ ۇعىنۋى مەن مەكتەپ باعدارلاماسى پاندەرىمەن ۇشتاستىرۋداعى ۇسىنىمدارعا ەرەكشە كوڭىل بولىنگەندىگىن جەتكىزدى.
اتالعان قۇجات وتانسۇيشىشتىك، ولكەتانۋشىلىق پەن كاسىبي باعدار بەرۋ باعىتتارى بويىنشا ازىرلەنگەن. ستراتەگيا مەكتەپكە دەيىنگى بالالاردى، باستاۋىش، ورتا جانە جوعارى سىنىپتاردىڭ وقۋشىلارىن قامتيدى. ونلاي ءىس- شارا بارىسىندا وزدەرىنىڭ پىكىرىمەن وسكەمەن قالاسى №27 ورتا مەكتەبىنىڭ قازاق ءتىلى جانە ادەبيەت ءپانىنىڭ مۇعالىمى بەك مۇقانوۆ، نۇر- سۇلتان قالاسى № 66 مەكتەپ- ليتسەيى ديرەكتورىنىڭ تاربيە ءىسى جونىندەگى ورىنباسارى تولقىن بەيسەكوۆا ءبولىستى.
سونىمەن قاتار، تالقىلاۋعا «بالاپان»، «ەل ارنا» تەلەارنالارىنىڭ باسشىلارى ماقپال جۇماباي، ارمان سەيتمامىت، «ۇلت تاعدىرى» ق ب جەتەكشىسى دوس كوشىم، «Atamnyn amanaty» ق ب جەتەكشىسى ءاليا ساعىمبايەۆا جانە باسقالار قاتىستى. تالقىلاۋ بارىسىندا قاتىسۋشىلار تاراپىنان مەكتەپكە دەيىن جانە مەكتەپ جاسىنداعى بالالاردى رۋحاني-ادامگەرشىلىك تاربيەلەۋ تۇرعىسىنا قاتىستى ءبىرقاتار ۇسىنىمدار ايتىلدى.