وسى ەلدىڭ مەتەرولوگيا جانە كليمات جونىندەگى اگەنتتىگىنىڭ باسشىسى دەني سەپتيادي وسىلاي دەپ مالىمدەدى. ال تەرگەۋشىلەر ۇشاق سۋعا قۇلاعان سوڭ جارىلعان دەيدى. قازىر اپات ايماعىندا ىزدەۋ جۇمىستارى جالعاسىپ جاتىر. ۇشاقتىڭ العاشقى قاڭقالارى دجاكارتا پورتىنا جەتكىزىلدى. ونىڭ ىشىندە اۋە كولىگىنىڭ قوزعالتقىشى، بيىكتىكتى ولشەيتىن رادار، اپاتتى جاعدايعا ارنالعان پاراشيۋت بار.
باگۋس پۋرۋحيتو، يندونەزيا ۇلتتىق ىزدەۋ- قۇتقارۋ قىزمەتىنىڭ باسشىسى:
- اپات ايماعىندا ىزدەستىرۋ- قۇتقارۋ جۇمىستارى كۇنى- ءتۇنى جۇرگىزىلىپ جاتىر. ەندى قۇتقارۋشىلار تەڭىز تۇبىنەن مارقۇمداردىڭ دەنەسى مەن ۇشاقتىڭ قاڭقالارىن شىعارۋعا كىرىسەدى. جانە لاينەردىڭ قارا جاشىكتەرىن شىعارۋمەن اينالىسادى. ولاردىڭ ورنى انىقتالعان.
ەسكە سالا كەتەيىك، وتكەن سەنبى كۇنى دجاكارتادان پونتياناكقا ۇشىپ شىققان Boeing 737 جولاۋشىلار ۇشاعى كوككە كوتەرىلگەن سوڭ 4 مينۋتتان كەيىن راداردان جوعالىپ كەتەدى. كوپ ۇزاماي، ونىڭ تەڭىزگە قۇلاعانى انىقتالادى. اپات كەزىندە ۇشاق بورتىندا 56 جولاۋشى مەن 6 ەكيپاج مۇشەسى بولعان. ولاردىڭ ءبارى - جەرگىلىكتى ازاماتتار.