«سايلاۋ ناۋقانى ءبىزدىڭ پارتياعا وڭاي بولمادى. دەگەنمەن دە جاس پارتيا رەتىندە ەلدى ارالاپ، حالىقتىڭ باتاسىن الىپ، بولاشاقتا اتقاراتىن ىستەرىمىزدى ايقىندادىق. پارتياعا مۇشەلىككە تىركەلگەندەر 300 مىڭنان اسىپ كەتتى، ءالى دە كەلىپ جاتىر. ءبىزدىڭ نەگىزگى ماقساتىمىز - پارتيا رەتىندە بۇگىننەن باستاپ ناقتى جۇمىسقا كىرىسۋ. ناۋقان ءوتتى، سايلاۋ ناتيجەسىن ورتالىق سايلاۋ كوميسسياسى رەسمي جاريالاي جاتار. ەل وڭىرلەرىن ارالاعان كەزدە حالقىمىزعا بەرگەن ءبىراز ۋادەمىز بار. بۇل تۇرعىدا پارتيانىڭ قۇرىلىمىنداعى مامانداردىڭ تاجىريبەسىن ەسكەرىپ، ناقتى جۇمىستى باستاۋعا كىرىسەمىز»، - دەدى «ADAL» پارتياسىنىڭ ءتوراعاسى سەرىك سۇلتانعالي.
ونىڭ ايتۋىنشا، قازىردەن باستاپ پارتيا قۇرىلىمى اۋقىمدى جۇمىس باستاۋدى جوسپارلاپ وتىر. «تاريحي باستاما اياسىندا پارتيانىڭ بولاشاعى بار ەكەنىن كورىپ وتىرمىز جانە وعان كۇمان جوق. جاس پارتيا ەكەنىمىزدى مويىندايمىز، سوندىقتان ءوزىمىزدىڭ ناتيجەلى جۇمىسىمىزدى كورسەتۋگە ءتيىسپىز. ءار سالادا ءبىزدىڭ ماماندار بار. ءبىز ەۆوليۋتسياعا ەكپىن قويعان پارتيامىز»، - دەدى س. سۇلتانعالي.
ونىڭ سوزىنە قاراعاندا، پارتيانىڭ تۇعىرناماسىنىڭ ارقاسىندا ءاربىر اۋىلدىڭ، اۋداننىڭ، وبلىستىڭ، قالانىڭ پروبلەماسى انىقتالدى. وسى ورايدا پارتيا وكىلدەرى ماسەلەلەردى شەشۋ ءۇشىن ءوز كومەگىن ۇسىناتىن بولادى.
تاراتىلعان مالىمەت بويىنشا 11 - جەلتوقساننان 8 - قاڭتارعا دەيىن پارتيا وكىلدەرى 5161 كەزدەسۋ وتكىزىپ، وعان 822152 ادام قاتىسقانى بەلگىلى بولدى. ولاردىڭ قورىتىندىسى بويىنشا 73 مىڭى پارتيا سايتىندا پارتياعا كىرۋگە ءوتىنىش قالدىردى. تەك ۇگىت- ناسيحات كەزەڭىندە پارتياعا كىرگەندەردىڭ سانى 53000-نان 311000-نان استام ادامعا دەيىن ءوستى. ماسەلەلەردى شەشۋ ءۇشىن ورتالىق اپپارات پەن پارتيانىڭ 202 وڭىرلىك فيليالى جۇمىس ىستەيتىن بولادى.
اۆتور: رۋسلان عابباسوۆ