تۇركىستان وبلىسى پوليتسيا دەپارتامەنتىنىڭ قىزمەتكەرلەرى ەكى كولىك جۇرگىزۋشىلەرى سوزگە كەلىسىپ قالعان ۆيدەونى كورگەن. تەكسەرۋ كەزىندە وقيعا كەلەس اۋدانىنداعى اۋىلداردىڭ بىرىندە بولعانى انىقتالعان.
Chevrolet كولىگىنىڭ جۇرگىزۋشىسى جول ەرەجەسىن ورەسكەل بۇزىپ، ءبىرجاقتى كوشە بويىنشا كەلە جاتقان كولىككە قارسى شىعىپ، «لادا» كولىگىن قاساقانا سوققان.
باستاپقىدا ۆيدەو اۆتورى ەر ادامعا بۇل ءبىرجاقتى كوشە ەكەنىن، ول كەرى بۇرىلۋى كەرەگىن تۇسىندىرگەن. ەگدە جاستاعى ەر ادام: «كولىگىڭدى ال نەمەسە مەن ونى يتەرىپ تاستايمىن. باسىپ وتەمىن» دەگەن. ناتيجەسىندە جۇرگىزۋشىلەر كەلىسە الماي، Chevrolet كولىگىنىڭ جۇرگىزۋشىسى «لادانى» باسىپ كەتپەك بولادى.
پوليتسەيلەر ەگدە جاستاعى ەر ادامنىڭ كىم ەكەنىن انىقتادى، ول - شىمكەنت قالاسىنىڭ تۇرعىنى بولىپ شىققان.
«ەر ادام اكىمشىلىك قۇقىق بۇزۋشىلىق كودەكسىنىڭ بىردەن ءتورت بابى بويىنشا اكىمشىلىك جاۋاپكەرشىلىككە تارتىلدى: 593-باپتىڭ 2-بولىگى، 601-باپ، 610-باپ جانە 611-باپ»، - دەدى پ د وكىلدەرى.
جينالعان دەرەكتەر ايىپپۇل سالىپ، كولىك يەسىن جۇرگىزۋ كۋالىگىنەن ايىرۋ ءۇشىن سوتقا جىبەرىلەدى. «لادا» جۇرگىزۋشىسى جول ەرەجەسىن بۇزعان ادامعا قاتىستى ارىز جازۋدان باس تارتقان. ارتىنشا ەكى كولىك جۇرگۋشىلەرى تاتۋلاسقانى بەلگىلى بولدى.