بۇل تۋرالى روسپوترەبنادزور باسشىسى اننا پوپوۆا «روسسيا-1» تەلەارناسىنىڭ ەفيرىندە ءمالىم ەتت، دەپ حابارلايدى قازاقپارات ت ا س س اگەنتتىگىنە سىلتەمە جاساپ.
«ءبىر ادامدا كوروناۆيرۋستىڭ جاڭا شتاممى انىقتالدى»، - دەدى ول ۇلى بريتانيادان ورالعان رف ازاماتتارىن تەكسەرۋ ناتيجەلەرىنە پىكىر بىلدىرە وتىرىپ.
ونىڭ ايتۋىنشا، كوروناۆيرۋستىڭ «بريتاندىق» شتاممى رەسەيدە العاش رەت بىلتىرعى جىلدىڭ سوڭىندا تىركەلگەن، ول ادام قازىر قاۋىپتى ەمەس.
«ءبىز بىلتىرعى جىلدىڭ سوڭىندا قازىرگى ۋاقىتتا ۇرەي تۋدىرىپ وتىرعان ۇلى بريتانياداعى سول شتامنىڭ نۇسقاسى ەلىمىزدە بار ەكەنىن انىقتادىق، تەك ءبىر ادامدا. ونىڭ جاعدايى جاقسى بولاتىن جانە قازىر دە جاقسى. ازاماتتا اۋرۋدىڭ ەش بەلگىسى بولعان جوق. ول قازىرگى ۋاقىتتا ۆيرۋستى تاراتپايدى»، - دەدى ول.
پوپوۆا اتاپ وتكەندەي، ۆيرۋس بۇرىنعىدان قاۋىپتىرەك بولا تۇسكەن جوق. الايدا ونىڭ جۇقپالىلىعى ارتقان. ەسكە سالا كەتسەك، وتكەن جىلدىڭ قاراشاسىنان باستاپ ەكى ەل اراسىنداعى اۋە قاتىناسى توقتاعانعا دەيىن رەسەيگە ۇلىبريتانيادان 7 مىڭنان اسا ادام ۇشىپ كەلگەن. ونىڭ 32 سىنەن كوروناۆيرۋس انىقتالدى.
14 -جەلتوقساندا ۇلىبريتانيانىڭ دەنساۋلىق ساقتاۋ مينيسترلىگىنىڭ باسشىسى مەتت حەنكوك بريتاندىق عالىمدار كوروناۆيرۋستىڭ مۋتاتسياعا ۇشىراعان جاڭا ءتۇرىن انىقتاعانىن جانە ول انگليانىڭ وڭتۇستىك- شىعىسىنداعى اۋرۋدىڭ تەز تارالۋىنا قاتىسى بار بولۋى مۇمكىن ەكەنىن حابارلادى. ونىڭ ايتۋىنشا، الدىن الا تالداۋ ۆيرۋستىڭ بۇل ءتۇرى بەلگىلى شتامداردان دا تەز تارايتىنىن كورسەتكەن.