فلوريدا مەن نيۋ- يورك ءورت ءسوندىرۋ دەپارتامەنتتەرى دە فەدەرالدى بيلىككە 6-قاڭتاردا جۇرت كاپيتولييدى باسىپ كىرگەن كەزدە كەي قىزمەتكەرلەرى سول جەردە بولۋى مۇمكىن ەكەنىن حابارلادى. ۆيردجينيانىڭ روكي- ماۋنت قالاشىعىنداعى پوليتسيا دەپارتامەنتى ەكى قىزمەتكەرى جۇمىستان تىس ۋاقىتتا ۆاشينگتونداعى شاراعا قاتىسقانى انىقتالىپ، ولاردى دەمالىسقا جىبەرگەنىن حابارلادى.
«روكي- ماۋنت قالاسى تولىعىمەن ءسوز بوستاندىعىن جانە زاڭدى تۇردەگى كەز كەلگەن جيىنعا قىزمەتكەرلەرىنىڭ قاتىسۋىن قولدايدى، ءبىراق سول كۇنى بولعان زاڭسىز ءىس- ارەكەتتەرگە كەلىسە المايدى»، - دەپ مالىمدەدى دەپارتامەنت.
سيەتل پوليتسيا دەپارتامەنتى دە ەكى قىزمەتكەرىنىڭ بۇل ىسكە قاتىسى بار- جوعىن انىقتاپ جاتقاندىقتان، ولاردى اكىمشىلىك دەمالىسقا جىبەرگەنىن حابارلادى.
«ەگەر كاپييتولييگە جاسالعان شابۋىلعا دەپارتامەنت وفيتسەرلەرى قاتىسقان بولسا، مەن ولاردى دەرەۋ جۇمىستان شىعارامىن»، - دەپ مالىمدەدى دەپارتامەنتتىڭ ۋاقىتشا باسشىسى ادريان دياس.
نيۋ- يوركتىڭ ءورت ءسوندىرۋ دەپارتامەنتى بۇرىنعى نەمەسە قازىرگى قىزمەتكەرلەرىنىڭ تارتىپسىزدىككە قاتىسقانى تۋرالى «قۇپيا مالىمدەمە» العاننان كەيىن اقپاراتتى ف ب ر- گە جىبەرگەنىن مالىمدەدى.
فلوريداداعى سەنفوردتىڭ ءورت ءسوندىرۋ دەپارتامەنتى شابۋىل جاساعان ادامداردىڭ سۋرەتىنىڭ ىشىندە قىزمەتكەرىنىڭ دە بەينەسىن بايقاعاندىقتان ءبىر ءورت ءسوندىرۋشىنى اكىمشىلىك دەمالىسقا جىبەرگەن. سەنبى كۇنى جەتەكشى زاڭ شىعارۋشى- دەموكراتتاردىڭ ءبىرى كاپيتولييدى قىلمىس ورنى دەپ اتاپ، بايلانىس وپەراتورلارى مەن الەۋمەتتىك جەلىلەردى تارتىپسىزدىككە قاتىستى بارلىق مالىمەتتى ساقتاۋعا شاقىردى.