بۇل تۋرالى ەلورداداعى «استانا وپەرا» تەاترىندا ورنالاسقان 115№ سايلاۋ ۋچاسكەسىندە داۋىس بەرگەننەن كەيىن ەلباسى نۇرسۇلتان نازاربايەۆ ءمالىم ەتتى، دەپ حابارلايدى قازاقپارات ءتىلشىسى.
«بيىل ەلىمىزدىڭ تاۋەلسىزدىك العانىنا 30 جىل تولادى. وسى ورايدا كوپ جۇمىستار جاسالادى. وزدەرىڭىز بىلەسىزدەر، وتە اۋقىمدى ۇگىت-ناسيحات جۇمىستارى جۇرگىزىلدى. دەپۋتاتتاردىڭ اراسىنا جاڭا ادامدار مەن جاستار، ايەلدەر، بىلىكتى ماماندار كەلسىن دەگەن نيەتپەن الدىن الا تاڭداۋ جاسالىپ، پرايمەريز بولدى. سايلاۋ تەك داۋىس بەرۋ عانا ەمەس، ول ەلىمىزدىڭ بولاشاعىنا بايلانىستى. قازاق ەلىنىڭ، وتانىمىزدىڭ بولاشاعى مەن ءۇمىتى، مۇددەسى ءبىر. ءبىزدىڭ قانىمىز دا، جانىمىز دا، جەرىمىز دە ءبىر. سوندىقتان الەم الدىندا تاعى دا ءبىر بىرلىگىمىزدى كورسەتۋ كەرەك»، - دەدى ق ر تۇڭعىش پرەزيدەنتى.
وسى ورايدا ن. نازاربايەۆ بۇل سايلاۋدا ەل بولاشاعى مەن بىرلىگى ءۇشىن، ەلىمىزدىڭ تىنىشتىعى ءۇشىن داۋىس بەرەتىنىن اتاپ ءوتتى.
«سوندىقتان داۋىس بەرۋگە كەلمەگەن ازاماتتاردى سايلاۋ ۋچاسكەسىنە كەلىپ، ءوزىنىڭ ازاماتتىق ءارى كونستيتۋتسيالىق قۇقىعىن ورىنداۋعا شاقىرامىن»، - دەدى ەلباسى.
ەسكە سالا كەتسەك، بۇگىن قازاقستان اۋماعىندا قۇرىلعان بارلىق سايلاۋ ۋچاسكەسىندە داۋىس بەرۋ ءجۇرىپ جاتىر.
دەپۋتاتتاردى سايلاۋ بويىنشا داۋىس بەرۋ قازاقستان رەسپۋبليكاسىنىڭ اۋماعىندا جانە ودان تىسقارى جەردە قۇرىلعان 10060 سايلاۋ ۋچاسكەسىندە جۇرگىزىلىپ وتىر.
سايلاۋ كوميسسيالارى داۋىس بەرۋ ورنى مەن ۋاقىتى تۋرالى دەر ۋاقىتىندا اقپارات بەردى. ەلوردا ۋاقىتىمەن ساعات 08.00 دە جاعداي بويىنشا ەلىمىزدەگى 9994 سايلاۋ ۋچاسكەسىندە جانە شەت مەملەكەتتەردەگى قازاقستان وكىلدىكتەرى جانىنداعى 17 سايلاۋ ۋچاسكەسىندە داۋىس بەرۋ باستالدى.
كونستيتۋتسيالىق مەرزىمگە ساي ءوتىپ جاتقان ءماجىلىس سايلاۋىنا ەلىمىزدە تىركەلگەن 5 ساياسي پارتيا، اتاپ ايتقاندا، «اۋىل» حالىقتىق-دەموكراتيالىق پاتريوتتىق پارتياسى، «Nur Otan» پارتياسى، «ADAL» ساياسي پارتياسى، قازاقستاننىڭ «اق جول» دەموكراتيالىق پارتياسى، «قازاقستاننىڭ حالىق پارتياسى» دەپۋتاتتىق مانداتتان ءۇمىتتى.