روجدەستۆو حريستوۆو - حريستياندىقتاردىڭ باستى مەرەكەلەرىنىڭ ءبىرى. بۇل مەرەكە يسا ءماسىحتىڭ ۆيفلەەمدە دۇنيەگە كەلۋى قۇرمەتىنە وراي اتالىپ وتەدى. الەمنىڭ كوپتەگەن ەلىندە بۇل مەرەكە كۇنى يۋليان جانە گريگوريان كۇنتىزبەسىنە قاراي ەرەكشەلەنەدى. سوچەلنيك دەپ اتالاتىن روجدەستۆو الدىنداعى كەشتەن باستاپ شىركەۋلەردە قۇدايعا تابىنۋ سالتاناتى وتكىزىلەدى. بۇل تۇندە روجدەستۆو الدىنداعى اۋىز بەكىتۋ اياقتالىپ، ءداستۇرلى تاعامدارعا تولى مەرەكەلىك داستارحان جايىلادى.
روجدەستۆو - الەمنىڭ جاڭارۋىنىڭ، يگىلىك پەن ادىلدىكتىڭ، قايىرىمدىلىقتىڭ جانە كومەك پەن قامقورلىققا ءزارۋ ادامدارعا شىنايى كوڭىل ءبولۋدىڭ نىشانى. قازاقستاندا پراۆوسلاۆ قاۋىمى باسقا كونفەسسيالاردىڭ قاتارىندا ەلىمىزدىڭ ومىرىنە بەلسەنە اتسالىسىپ، حالىقتىڭ بىرلىگىنە، قوعامدىق كەلىسىم مەن ءدىنارالىق ديالوگقا باعا جەتپەس ۇلەسىن قوسىپ كەلەدى.
ايتا كەتەرلىگى، قازاقستان رەسپۋبليكاسى ەڭبەك كودەكسىنىڭ 96-بابىنا سايكەس قۇربان ايت جانە روجدەستۆو ءدىني مەرەكەلەرى رەسمي مەيرامعا جاتپايدى، ءبىراق دەمالىس كۇنى بولىپ سانالادى. وسىعان وراي 7 - قاڭتار كۇنى قازاقستاندىقتار دەمالادى.
اۆتور: ايان بەكەن ۇلى