بۇگىن Instagram مەن Facebook ترامپتىڭ اككاۋنتىن - 24 ساعاتقا، ال Twitter – 12 ساعاتقا بلوكتادى. وسى الەۋمەتتىك جەلىلەرمەن بىرگە Youtube تە ترامپتىڭ كاپيتوليي ماڭىندا جاقتاستارىنا جولداعان ۆيدەوۇندەۋىن كورسەتپەي تاستادى. الەۋمەتتىك جەلىلەردىڭ اكىمشىلىگى بۇل ۆيدەو ولاردىڭ تالاپتارىن بۇزاتىنىن ءمالىم ەتتى. بۇل – ا ق ش پرەزيدەنتى وسى ۋاقىت ارالىعىندا اتالمىش پلاتفورمالاردا ەشتەڭە جاريالاي المايدى دەگەن ءسوز.
ەسكە سالا كەتەيىك، كەشە ا ق ش كونگرەسى سايلاۋشىلاردىڭ داۋسىن ەسەپتەپ، 2020 -جىلعى پرەزيدەنت سايلاۋىنىڭ قورىتىندىسىن شىعارۋ ءۇشىن جينالعان بولاتىن. وسى كۇنى دونالد ترامپ جاقتاستارىنىڭ جاپپاي نارازىلىق اكسياسىنان كەيىن وعان قاتىسۋشىلاردىڭ ءبىر توبى كونگرەسس عيماراتىنا باسىپ كىردى. دونالد ترامپ وسىنىڭ الدىندا ۆاشينگتوننىڭ ورتاسىندا مىڭداعان ادام جينالعان ميتينگتە ءسوز سويلەپ، ءوزىنىڭ جەڭىلگەنىن مويىندامايتىنىن ايتقان. ءسويتىپ وزىنە سەنەتىن قاۋىمدى كاپيتولي عيماراتىنا بارىپ، نارازىلىق بىلدىرۋگە شاقىردى. بيلىك ۆاشينگتوندا كومەندانتتىق ساعات ەنگىزدى.
اۆتور: جانات قاپالبايەۆا