ق ر قارۋلى كۇشتەرى باس شتابى تاربيە جانە يدەولوگيالىق جۇمىستار دەپارتامەنتى باستىعىنىڭ ورىنباسارى پولكوۆنيك ەرميان بياتوۆتىڭ ايتۋىنشا، بۇگىندە تاڭدا ءار لاۋازىمدى تۇلعانىڭ مانسابى بولىمشەدەگى تاربيە جۇمىسىن دۇرىس ۇيىمداستىرۋعا بايلانىستى بولادى. ياعني، لاۋازىمدى كوتەرۋ، اسكەري اتاق الىپ، اكادەمياعا ءتۇسۋ ءۇشىن باستىقتار وسى ماسەلەگە ەرەكشە نازار اۋدارۋى كەرەك.
«بارلىق دارەجەدەگى كومانديرلەر، سونداي- اق سەرجانتتار بۇعان جەكە باسىمەن جاۋاپ بەرەدى. ولار اسكەري قىزمەتشىلەر اراسىنداعى ءتارتىپتى قولداۋعا بارلىق كۇش- جىگەرىن سالادى»، - دەدى ەرميان بياتوۆ.
ەڭ الدىمەن بارلىق اسكەري قىزمەتشىنىڭ جاۋىنگەرلىك دايارلىعى، سپورتتى، بوس ۋاقىت پەن تاربيە ءىس- شارالارىن قامتيتىن ناقتى كۇن ءتارتىبى تۇراقتى تۇردە باقىلانادى. جەكە قۇرامدى باقىلاۋ ءۇشىن «جاۋىنگەرلىك دوس» جۇيەسى ەنگىزىلگەن. ول بويىنشا ادەتتە لاۋازىمى مەن اسكەري اتاعى بويىنشا تەڭ ەكى اسكەري قىزمەتشى ءبىر- بىرىنە بەكىتىلەدى. بۇل مىنەز- قۇلىقتاعى نورمادان اۋىتقۋ بەلگىلەرىن ۋاقتىلى انىقتاۋعا جانە اسكەري ۇجىمدا جاعىمسىز قىلىقتاردى الدىن الۋعا مۇمكىندىك بەرەدى. سونداي- اق، اسكەري بولىمدەردە قورعانىس مينيسترلىگى ازىرلەگەن وقۋ مودۋلدەرى بويىنشا وقىتۋ مەن تاربيەلەۋ جۇمىستارى جۇرگىزىلۋدە. ولارعا احۋالدىق كەيستەر قوسا بەرىلەدى. وندا قاقتىعىستاردى وڭتايلى شەشۋ جولدارى، جارعىدان تىس قارىم- قاتىناستىڭ سالدارىنان ورىن الاتىن احۋالدار ۇسىنىلعان. وسى باعىتتا بەلسەندى تۇسىندىرمە جۇمىستاردى اسكەري پوليتسيا دا جۇرگىزەدى. ەگەر تۇلعا ارالىق نەمەسە قىزمەتتىك ماسەلەلەردى شەشۋدە بىرەۋ كۇش قولدانسا، قۇقىق قورعاۋ ورگاندارى دەرەۋ ارەكەت ەتەدى.
«قابىلدانعان ۇيىمداستىرۋشىلىق شارالاردى ەسكەرە وتىرىپ، قۇقىققا قارسى ارەكەت جاساۋ جانە ونى بايقاماي قالۋ شىن مانىندە مۇمكىن ەمەس. بولىمدەردەگى بەينەباقىلاۋ جۇيەسى بارلىق نىسان مەن ءۇي- جايلاردى قامتيدى. كەز كەلگەن جاراقات، انىقتالعان جاعدايدا قىزمەتتىك تەكسەرۋ جۇرگىزىلەدى، ماتەريالدار قاراۋ ءۇشىن اسكەري پوليتسياعا جىبەرىلەدى»، - دەيدى ول.
ءتيىمدى ويلايتىن جاستار اسكەري بيلەت الۋدىڭ ورنىنا سوتتالۋشىنىڭ ورىندىعىنا وتىرعىزىلىپ، ءومىر بويى سوتتالعاندىعىن ايشىقتايتىن تاڭبا تاعىلاتىنىن انىق تۇسىنەدى. جەكە قۇراممەن جۇمىس ىستەيتىن وفيتسەرلەر دە، سەرجانتتار دا، قىزمەتكەرلەر دە الىمجەتتىككە جول بەرسە الەۋمەتتىك كەپىلدىكتەرى بار تۇراقتى جۇمىستان ايىرىلۋى مۇمكىن.