«مەملەكەت باسشىسىنىڭ «ەگەمەن قازاقستان» گازەتىنە جاريالانعان «تاۋەلسىزدىك بارىنەن قىمبات» اتتى ماقالاسىن ەرەكشە ىقىلاسپەن وقىپ شىقتىم. پرەزيدەنتىمىز بۇگىنگە دەيىنگى جەتىستىكتەرىمىزدى وي ەلەگىنەن وتكىزىپ، الداعى ماقسات- مىندەتتەرگە نازار اۋدارعان ەكەن. مەملەكەتتىلىكتى نىعايتۋ، تاۋەلسىزدىكتى ساقتاۋ، ۇلتتى ۇلىقتاۋ باعىتتارى بويىنشا ءتيىستى ورگاندارعا ناقتى تاپسىرمالار دا بەرىلگەن. سوندىقتان بۇل ەڭبەكتى باعدارلامالىق قۇجاتتىڭ جۇگىن ارقالاعان دۇنيە دەۋگە تولىق نەگىز بار. ماقالادا ەگەمەن ەلىمىزدىڭ باعىت- باعدارى، قوعامدى الاڭداتقان وزەكتى ماسەلەلەر، جاھاندانۋ داۋىرىندەگى جاڭا سىن- قاتەرلەر بويىنشا سۇراقتارعا ناقتى جاۋاپ بەرىلگەن. اسىرەسە، مەملەكەتتىڭ جەرىنە قاتىستى كەلتىرىلگەن پايىمدار حالىق تاراپىنان تولىق قولداۋ تابۋدا. مەملەكەت باسشىسى اتاپ وتكەندەي، شىن مانىندە، بىزگە وسىناۋ ۇلان- عايىر اۋماقتى سىرتتان ەشكىم سىيعا تارتقان جوق. بۇل جەر - ەجەلدەن قازاقتىڭ اتا قونىسى، قاستەرلى مەكەنى»، - دەپ جازدى سەنات سپيكەرى Facebook پاراقشاسىندا.
ونىڭ اتاپ وتۋىنشە، مەملەكەتتىك ءتىلدى دامىتۋعا، قانداستار كوشىن ءارى قاراي جانداندىرۋعا، شەكارا ماڭىنداعى اۋىلداردى وركەندەتۋگە قاتىستى ايتىلعان ۇسىنىستار جۇرتشىلىقتىڭ ەرەكشە قىزىعۋشىلىعىن تۋدىرىپ وتىر. وعان ماقالا جاريالانعالى بەرى بۇقارالىق اقپارات قۇرالدارى مەن الەۋمەتتىك جەلىلەردە ايتىلىپ، جازىلىپ جاتقان پىكىرلەر ايقىن دالەل. ناۋرىز مەيرامىن اتاپ ءوتۋدىڭ جاڭا تۇجىرىمداماسىن دايىنداۋ باستاماسى دا حالىقتىڭ بەرەكە- بىرلىگىن نىعايتۋ جولىنداعى ماڭىزدى قادام ەكەنى انىق. پرەزيدەنتىمىزدىڭ الاش ارىستارىنىڭ اسىل مۇراسىن يگەرۋ جالعاسا بەرەتىنى تۋرالى ايتقان ءسوزى دە كوپشىلىكتىڭ كوڭىلىنەن شىققانى داۋسىز.
«ماقالادا جازىلعانداي، بيىل تاۋەلسىزدىگىمىزدىڭ 30 جىلدىعىمەن بىرگە ازاتتىقتىڭ اق تاڭىن جاقىنداتا تۇسكەن جەلتوقسان وقيعاسىنىڭ 35 جىلدىعىن اتاپ وتەمىز. حالقىمىزدىڭ باسىنان وتكەن الاپات اشارشىلىقتىڭ العاشقى كەزەڭى - 1921-1922 -جىلدارداعى ناۋبەتتەن بەرى دە 100 جىل ءوتتى. سونداي- اق، الەمدىك شەجىرەدە تەڭدەسسىز شەشىم بولىپ سانالاتىن سەمەي پوليگونىنىڭ جابىلعانىنا 30 جىل تولادى. مۇنىڭ ءبارى ءبىزدىڭ تاريحىمىز. ال، تاريحتى دارىپتەۋ - بارشامىزدىڭ ابىرويلى مىندەتىمىز. سول سەبەپتى، پرەزيدەنتىمىز ۇلتىمىزدىڭ وتكەنىنە تاۋەلسىز كوزقاراسپەن قارايتىن كەز كەلگەنىن، عالىمدارىمىز بەن تاريحشىلارىمىز بۇل باعىتتا اۋقىمدى جۇمىس اتقارۋ قاجەتتىگىن ناقتى اتاپ ءوتتى. وسى ورايدا مەملەكەت باسشىسىنىڭ فيلم ءتۇسىرۋ ىسىندە تاريحي تاقىرىپتارعا باسىمدىق بەرۋ تۋرالى تاپسىرماسىنىڭ ماڭىزى زور. جاسىراتىنى جوق، ءبىز ەل، جەر، وتان تۋرالى سويلەگەندە كەيدە جالاڭ ۇرانعا بوي الدىرىپ جاتامىز. پرەزيدەنتىمىز ماقالادا وسى ماسەلەگە نازار اۋدارىپ، ءقازىر سوزبەن ەمەس، ىسپەن دالەلدەيتىن كەزەڭ ەكەنىنە باسا ءمان بەرگەن. سونىڭ ىشىندە قورشاعان ورتانى قورعاۋعا قاتىستى ايتىلعان ويلار تابيعاتتى ايالاۋدا ءار ازامات جاۋاپتى ەكەنىن جانە اركىم ناقتى ىسپەن ۇلەس قوسۋ قاجەتتىگىن انىق كورسەتەدى»، - دەدى ماۋلەن اشىمبايەۆ.
سونىمەن قاتار ول قاسىم- جومارت كەمەل ۇلى ماقالادا ساياسي- ەكونوميكالىق رەفورمالاردىڭ دا جۇيەلى تۇردە جالعاساتىنىن قاداپ ايتقاندىعىنا نازار اۋدارتادى.
«وسى باعىتتاعى اۋىل جانە كەنت اكىمدەرىن سايلاۋ باستاماسى ەلىمىزدە ساياسي جاڭعىرۋدىڭ جاڭا كەزەڭىنە جول اشادى دەپ سەنەمىز. پرەزيدەنتىمىز ايتقانداي، ءبىزدىڭ ماقساتىمىز - كەلەر بۋىنعا قازاقستاندى تۇعىرى بەرىك، ەكونوميكاسى قۋاتتى، رۋحى اسقاق مەملەكەت رەتىندە تابىستاۋ جانە سول ىستەردى لايىقتى جالعاستىراتىن جاسامپاز ۇرپاق تاربيەلەۋ. مۇنداي جۇمىستارعا ءارقايسىمىز اتسالىسۋىمىز قاجەت. وسىلايشا، مەملەكەت باسشىسى اتالعان ماقالا ارقىلى مەملەكەتتىلىكتى كۇشەيتۋگە جانە يدەولوگيالىق جۇمىستارعا قاتىستى ەلىمىزدىڭ الدىندا تۇرعان نەگىزگى باسىمدىقتاردى انىقتاپ بەردى. بۇل باعىتتاعى بارلىق باستامانى تابىستى ىسكە اسىرۋ ءۇشىن سەنات زاڭنامالىق تۇرعىدان قولداۋ كورسەتۋگە، تاۋەلسىزدىگىمىزدىڭ قادىر- قاسيەتىن ارتتىرۋعا جانە ەلدىگىمىزدى ەڭسەلى ەتۋگە ءوز ۇلەسىن قوساتىن بولادى»، - دەدى سەنات ءتوراعاسى.
اۆتور: مارلان جيەمباي