ەلىمىزدىڭ تاعى ءبىرقاتار وڭىرىندە جول جابىلدى

«قازاۆتوجول» كاسىپورنىنىڭ مالىمەتىنە سەنسەك، اقمولا وبلىسىندا «ەكاتەرينبۋرگ- الماتى» اۆتوجولىنىڭ 1291-1353 شاقىرىمى جابىلعان. بۇل - جالتىركول اۋىلىنان باستاپ قاراعاندى وبلىسىنىڭ شەكاراسىنا دەيىنگى ارالىق. سونىمەن بىرگە «نۇر- سۇلتان- پەتروپاۆل» جولىنىڭ 18-231 شاقىرىمى، ياعني ەلوردادان شۋچينسك قالاسىنا دەيىنگى جول جابىق. ايتا كەتەيىك، ءبىز بۇعان دەيىن اقمولادا ديزەلمەن جۇرەتىن كولىكتەردىڭ جانە اۆتوبۋستاردىڭ قوزعالىسىنا شەكتەۋ قويىلعانىن جازعان بولاتىنبىز.

قاراعاندى وبلىسىندا قاتتى ايازعا بايلانىستى 2-قاڭتار كەشكى 18:00 باستاپ «ەكاتەرينبۋرگ- الماتى» تاسجولىنىڭ 1353-1425 شاقىرىمىندا، اتاپ ايتقاندا اقمولا وبلىسى شەكاراسىنان تەمىرتاۋ قالاسىنا دەيىن ديزەل قولداناتىن كولىكتىڭ جۇرۋىنە رۇقسات جوق. ءدال وسىنداي شەكتەۋ «نۇر- سۇلتان- قابانباي باتىر- نۇرا- تەمىرتاۋ» جولىنىڭ 51-104 شاقىرىمىندا دا ەنگىزىلىپ وتىر.

ودان بولەك، « قىزىلوردا- پاۆلودار» اۆتوجولىنىڭ 1066-1135 شاقىرىمى - مولودەجنىي ەلدىمەكەنىنەن پاۆلودار وبلىسىنىڭ شەكاراسىنا دەيىنگى ارالىق جابىلدى. الماتى وبلىسىندا دا وسىنداي جاعداي.

كەشە ساعات 17:00 باستاپ «الماتى- وسكەمەن» تاسجولىنىڭ 558-615 شاقىرىمىندا، ءۇشارال قالاسىنان شىعىس قازاقستان وبلىسىنىڭ شەكاراسىنا دەيىن ديزەلمەن جۇرەتىن اۆتوماشينالار مەن قوعامدىق كولىكتىڭ قوزعالىسىنا شەكتەۋ قويىلعان. سونداي- اق پاۆلودار وبلىسىندا 2-قاڭتار كەشكى 18:00 باستاپ بارلىق باعىتتاعى جولداردا ديزەل قولداناتىن كولىكتەر مەن اۆتوبۋستاردىڭ جۇرۋىنە تىيىم سالىندى.

ەسكە سالا كەتەيىك، ءبىز بۇعان دەيىن سولتۇستىك قازاقستان وبلىسىندا جانە نۇر- سۇلتان قالاسىندا قاتتى ايازعا بايلانىستى جول جابىلعانىن جازعان بولاتىنبىز. سونىمەن قاتار قوستاناي مەن شىعىس قازاقستاندا دا كولىك قوزعالىسىنا شەكتەۋ قويىلعان.