ءبىر جاعىنان ۆاكسينالاۋ ناۋقانى دا قارقىندى جۇرۋدە. قازىردىڭ وزىندە جۇزدەگەن مىڭ تۇرعىن ەكپە سالدىرىپ ۇلگىرگەن. ينتەرنەت پەن تەلەارنا ساياساتكەرلەردىڭ قۇتتىقتاۋىنان بوساماي جاتىر. بۇل جىلداعى ءۇردىس. بيىلعى ءبىر ەرەكشەلىك، ولار ورىس ءتىلدى يزرايلدىكتەرگە باسا نازار اۋدارعان. مۇنىڭ سەبەبى تۇسىنىكتى. جاقىندا كەزەكتەن تىس سايلاۋ وتەدى.
ياير لاپيد، «ەش اتيد» پارتياسىنىڭ جەتەكشىسى:
- قاسىق ال دا، وليۆەنى سوڭعى تۇيىرىنە دەيىن جەپ قوي. سوندا ەلىمىزدىڭ ورىس ءتىلدى قاۋىمىنا دەگەن كوڭىلىڭدى، سايلاۋدا جەڭىسكە جەتۋ ءۇشىن بارىنە دايىن ەكەنىڭدى بىلدىرەسىڭ.
كوروناۆيرۋس جاڭا جىلدى تويلاۋعا ەداۋىر تۇزەتۋ ەنگىزدى. پالەستيناعا تيەسىلى ۆيفلەەمدە جىلدا وتەتىن شەرۋگە تىيىم سالىندى. مۇنداي شەكتەۋ ءتىپتى اسكەري قاقتىعىستار كەزىندە دە بولماعان. جەرگىلىكتى حريستياندار مەرەكەنى وتباسىندا اتاپ وتەدى.
يزرايلدە باستى جاڭا جىلدىق سىيلىق - ۆاكسينا. ءبىر اپتادا جارتى ميلليون ادام الىپ ۇلگەرگەن. بۇل الەم بويىنشا ەڭ جوعارى كورسەتكىش. وسى قارقىننان تايماسا، جوسپار مەرزىمىنەن بۇرىن ورىندالۋى ابدەن مۇمكىن.
بينيامين نەتانياحۋ، يزرايل پرەمەر- ءمينيسترى:
- ەكپەنى ءبىرىنشى كەزەكتە ءومىرى قىل ۇستىندە تۇرعان توپتار الۋى ءتيىس. سەبەبى ولاردىڭ اراسىندا ءولىم- ءجىتىم كوپ. تەك وسىلاي عانا ەكونوميكانى وڭالتىپ، بيزنەسكە كومەكتەسە الامىز. جاعدايدى قالىپقا كەلتىرۋ - ءبىزدىڭ باستى ماقساتىمىز.
ءبىراق ماسەلە جەتىپ ارتىلادى. كەيبىر اۋرۋحانالاردىڭ قىزمەتكەرلەرى ەكپەنى ەرەجە بويىنشا 60 تان اسقاندارعا ەمەس، جاس تۋىستارىنا سالعان. دەنساۋلىق ساقتاۋ ءمينيسترى مۇنداي اۋرۋحانالارعا ۆاكسينانى ەڭ سوڭىنان بەرۋ كەرەك دەپ ايىپتادى. ال ەلدەگى كارانتين ءتارتىبى اقپانعا دەيىن ساقتالماق.
www.24.kz