سولتۇستىك قازاقستان وبلىسى پوليتسيا دەپارتامەنتى باسپا ءسوز قىزمەتىنىڭ مالىمەتىنشە، وتكەن تاۋلىكتە پەتروپاۆلدا جول-كولىك وقيعالارىنا قاتىستى 20 ماتەريال تولتىرىلعان. مەرەكەلىك قاربالاستا كولىك جۇرگىزۋشىلەرى قىراعىلىقتى ۇمىتپاي، ەكى ەسە مۇقياتتى بولعانى ءجون.
«قازىر قالا كوشەلەرىندە كەپتەلىس. مەرەكە قارساڭىندا جاقىندارىنا سىيلىق، ازىق- تۇلىك الۋ ءۇشىن وبلىس ورتالىعىنا اۋىلداردان كوپ ادامدار كەلەدى. جولدا ءجۇرۋ ەرەجەسىن قاتاڭ ساقتاۋعا كەڭەس بەرەمىز. قىراعىلىقتى كۇشەيتىپ، جولدا بارىنشا ۇقىپتى بولىڭىزدار»، - دەيدى س ق و پ د پاترۋلدى پوليتسيا باتالونىنىڭ كومانديرى قانات ءالىمجانوۆ. جاياۋ جۇرگىنشىلەر دە پوليتسەيلەردىڭ نازارىندا.
«اسىعىپ ءجۇرىپ، جولدى بەلگىلەنبەگەن جەردەن وتۋگە بولمايدى. باستارىڭىزدى قاۋىپ-قاتەرگە تىكپەڭىزدەر. قاۋىپسىزدىك ءبىرىنشى ورىندا تۇرۋى قاجەت. قازىر مەرەكەلىك قاربالاس ەكەنىن تۇسىنەمىز، سىيلىقتار، ءتاتتى-ءدامدى الۋ كەرەك. ارنايى جۇرگىنشىلەر وتكەلىنەن وتكەندە دە جان- جاققا قاراپ الىپ، قاۋىپسىز بولعاندا عانا وتۋگە بولادى. قازىر قىس، كوكتايعاق. كولىك جۇرگىزۋشىسى الدىنان جاياۋ جۇرگىنشى اتىپ شىققاندا كەنەتتەن تەجەي المايدى»، - دەيدى ءتارتىپ ساقشىسى.
جولداردىڭ دەر كەزىندە تازالانىپ، ءتيىستى جاعدايدا بولۋىن دا پوليتسەيلەر ۇنەمى قاداعالاپ وتىرادى. جەلتوقسان ايىندا ءوز مىندەتتەرىن دۇرىس اتقارماعان كوممۋنالدىق قىزمەتتەرگە 23 ۇيعارىم جانە 3 اقپاراتتىق حات جىبەرىلدى.
اۆتور: اقەركە داۋرەنبەك قىزى