ۇلى بريتانيا - AstraZeneca كومپانياسىنىڭ پرەپاراتىن ماقۇلداعان الەمدەگى العاشقى ەل بولدى. ەل بيلىگى اتالعان ۆاكتسينانىڭ 100 ميلليون دوزاسىنا تاپسىرىس بەردى. بۇل 50 ميلليون ادامدى ۆاكتسيناتسيالاۋعا جەتكىلىكتى. Pfizer جانە BioNTech كومپانيالارىنىڭ ۆاكتسيناسىنا بەرىلگەن تاپسىرىستى ەسكەرگەندە دوزالار سانى ەلدىڭ بارلىق تۇرعىنى ءۇشىن جەتەدى. ۆاكتسينا 2020 -جىلدىڭ باسىندا ازىرلەنگەن. ءساۋىر ايىندا العاشقى ەرىكتىگە سىناق جاسالدى. كەيىننەن تەستىلەۋگە مىڭ ادام قاتىستى. اتالعان پرەپاراتتىڭ -70 گرادۋس سەلسيدەن اسپايتىن تەمپەراتۋرادا ساقتاۋدى قاجەت ەتەتىن Pfizer جانە BioNTech ۆاكتسيناسىنان ايىرماشىلىعى AstraZeneca ۆاكتسيناسىن قاراپايىم توڭازىتقىشتا ساقتاۋعا بولادى. سوندىقتان دا ونى تاسىمالداۋ اسا قيىندىق تۋعىزبايدى. AstraZeneca ەلدى اپتاسىنا 2 ميلليون دوزاعا دەيىن ۆاكتسينامەن قامتاماسىز ەتە الاتىنىن حابارلادى. بريتانيادا جاپپاي ۆاكتسيناتسيا باستالعالى 600 مىڭنان استام ادامعا ەكپە سالىنعان. پرەمەر- مينيستر بوريس دجونسون ۆاكتسينانىڭ جاسالۋىن بريتاندىق عىلىمنىڭ جەڭىسى دەپ اتادى.
«ەندى ءبىز مۇمكىندىگىنشە كوپ ادامدى جانە تەزىرەك ۆاكتسيناتسيالايمىز»، - دەدى ول ءوزىنىڭ Twitter پاراقشاسىندا.
ەلدىڭ دەنساۋلىق ساقتاۋ ءمينيسترى مەتت حەنكوك BBC - گە بەرگەن سۇحباتىندا ۆاكتسينانىڭ ماقۇلدانۋىن ۆيرۋسپەن كۇرەستىڭ ماڭىزدى ءساتى دەپ اتادى.
«2021 -جىل ءۇمىت پەن قالپىنا كەلتىرۋ جىلى بولۋى مۇمكىن. ويتكەنى ءبىز پاندەميادان قالاي شىعۋعا بولاتىنىن كورىپ وتىرمىز»، - دەپ اتاپ ءوتتى ول.
AstraZeneca كومپانياسىنىڭ پرەپاراتىمەن ۆاكتسيناتسيالاۋ دۇيسەنبى، 4-قاڭتاردا باستالادى دەپ كۇتىلۋدە. بريتانيادا وتكەن تاۋلىكتە 50 مىڭ ادام كوروناۆيرۋس جۇقتىردى. وسى ۋاقىتقا دەيىن 981 مىڭ ادام كوروناۆيرۋستان كوز جۇمعان.