- كوروناۆيرۋس ينفەكسياسى جۇرەك جانە قان تامىرلارىنا قالاي اسەر ەتەدى؟
- ەۋروپالىق كارديولوگتار قوعامىنىڭ (ە ك ق) ۇسىنىمىنا سايكەس قازىرگى ساتتە ۆيرۋستىڭ جۇرەككە تۋرا اسەرى تۋرالى دالەل جوق. الايدا، ينفەكتسيادان تۋىنداعان ءجىتى قابىنۋدىڭ رەاكتسياسى جۇرەك قىزمەتىن ناشارلاتىپ جانە جۇرەك قىزمەتىنىڭ كەمىستىگى بار پاتسيەنتتەردە سيمپتومداردى اسقىندىرا الادى. جۇرەك قىزمەتىنىڭ كەمىستىگى، ديلاتاتسيالىق كارديوميوپاتيا، وڭ جاق قارىنشانىڭ ورشىگەن اريتموگەندىك كارديوميوپاتياسى بار پاتسيەنتتەر جانە تۋا بىتكەن جۇرەك كەمىستىگى بار پاتسيەنتتەر تاۋەكەل توبىنا بەيىم بولادى. ۆيرۋس كارديوستيمۋلياتور جانە كارديوۆەرتەر- دەفيبريلياتور سەكىلدى يمپلانتتالاتىن قوندىرعىلاردى زاقىمدايدى نەمەسە جۇرەك قاقپاقشالارىنىڭ كەمىستىگى بار پاتسيەنتتەردە ينفەكتسيالىق ەندوكارديت تۋعىزاتىنىنا دالەل جوق. جۇيەلى تۇردە بولاتىن اۋىر قابىنۋ پروتسەستەرى اريتميانى اسقىندىرادى نەمەسە ءتىپتى كەي پاتسيەنتتەردى جۇرەكشە فيبريللياتسياسىنا الىپ كەلەدى. ۆيرۋستىڭ قابىناتىن اسەرىن ەسكەرە وتىرىپ، تەوريالىق جاعىنان ۆيرۋستىق ينفەكتسيا كورونارلىق ارتەريالاردا اتەروسكلەروتيكالىق ءتۇيىنداقتاردىڭ (ماي شوگىندىلەرى) ءۇزىلۋىن تۋدىرىپ، بۇل جۇرەك ۇستاماسىنا اكەلەدى دەگەن ءقاۋىپ بار. كەۋدەسىندە جايسىزدىقتى سەزىنەتىن ادامدار كوروناۆيرۋس سيمپتومدارىنىڭ پايدا بولعان كەزىندە مىندەتتى تۇردە دارىگەرگە قارالۋى ءتيىس.
- بۇل ىندەت جۇرەك- قانتامىر اۋرۋلارىنىڭ قوزۋىنا ىقپال ەتە مە؟
- د د ۇ دەرەكتەرىنە سايكەس، COVID-19 پاندەمياسىنا قاراماستان، دۇنيە جۇزىندە بولىپ جاتقان ءولىمنىڭ نەگىزگى سەبەبى - جۇرەك- قان تامىر اۋرۋلارى بولىپ قالا بەرەدى. الايدا دۇنيە جۇزىندە پاندەميا كەزىندە ج ق ا اسقىنۋ قاۋپى ءبىرشاما ارتتى.
- جۇرەگى اۋىراتىن ناۋقاستار كوروناۆيرۋس جۇقتىرىپ السا، نەگە باسا ءمان بەرۋى كەرەك؟
- ازىرشە مۇنداي پاتسيەنتتەردە COVID-19 جۇقتىرعاننان كەيىن وكپە ينفەكتسياسى دامۋىنىڭ مۇمكىندىگى جوعارى دەگەن دەرەكتەر جوق، الايدا بۇل تۇماۋ سەكىلدى باسقا ۆيرۋستاردا ينفەكتسيانىڭ دامۋى سەكىلدى مۇمكىن بولادى. ەگەر ادامدار جۇرەك- قانتامىر اۋرۋلارىنىڭ سيمپتومدارىن كوروناۆيرۋس ەپيدەمياسى كورىنىسىندە سەزىنەتىن بولسا، ولاردى نازاردان تىس قالدىرماۋى ءتيىس. ەگەر دەنە شىنىقتىرۋ كەزىندە نەمەسە تىنىش جاتقاندا كەۋدەڭىزدە اۋىرۋ سەزىمى پايدا بولىپ، تىنىس الۋ قيىنداسا، جۇرەك قاعىسى جيىلەنىپ نەمەسە ەستەن تاناتىنداي السىزدىكتى سەزىنسەڭىز، شۇعىل جەدەل جاردەم شاقىرۋ قاجەت. ماماندار ەمدەۋگە جاتقىزۋ تۋرالى شەشىم قابىلداماس بۇرىن ايتىلعان سيمپتومدار مەن جالپى قاراپ- تەكسەرۋدىڭ نەگىزىندە جاي- كۇيىڭىزدى باعالايدى.
- وكپەنى جاساندى جەلدەتۋ اپپاراتى جۇرەگى اۋىراتىندارعا قاۋىپتى دەيدى، بۇل قانشالىقتى راس؟
- وكپەنى جاساندى جەلدەتۋ اپپاراتىنا قوسۋ - ادام ءومىرىن ساقتاپ قالۋدىڭ باسقا تاسىلدەرى بولماعان جاعدايدا دارىگەرلەر قابىلدايتىن ەڭ سوڭعى شەشىم. پاتسيەنتتەردى وكپەنى جاساندى جەلدەتۋ اپپاراتىنا قوسۋعا بەرىلەتىن كورسەتكىشتەر مەديتسينا قىزمەتكەرلەرىنە ارنالعان ۇسىنىمدا ناقتى جازىلعان. جاساندى جەلدەتكىش وكپەنىڭ وتتەگىنى جەتكىلىكتى دەمالا الماي جانە ونا جينالىپ قالعان كومىرقىشقىل گازىن شىعارا الماعان جاعدايدا قاجەت. بۇل جاعدايدا وكپەنى جاساندى جەلدەتۋ اپپاراتى تىنىس الۋ جۇيەسىنىڭ قىزمەتىن اتقارادى.
ەگەر تىنىس الا الماعان ادامدى وكپەنى جاساندى جەلدەتۋ اپپاراتىنا قوسپايتىن بولسا، ونىڭ ىشكى اعزالارى وتتەگىمەن قامتاماسىز ەتىلمەي قالادى. وسىدان كەيىن كەشىكپەي جۇرەك ءوز سوعىسىن توقتاتادى، قانمەن قامتاماسىز ەتىلمەيدى، بىرنەشە مينۋتتىڭ ىشىندە پاتسيەنت قايتىس بولىپ كەتۋى مۇمكىن. وسىعان بايلانىستى ەگەر وكپەنى جاساندى جەلدەتۋ اپپاراتىنا قوسۋ قاجەتتىلىگى تۋىندايتىن بولسا، وندا جۇرەك اۋرۋى بار نەمەسە جوق ادامدار ءۇشىن وكپەنى جاساندى جەلدەتۋ اپپاراتىنىڭ ءقاۋپى تۋرالى ماسەلە ءتىپتى تالقىلانبايدى.
- دارىگەرلەر جۇرەك- قانتامىر اۋرۋىمەن اۋىراتىن ناۋقاستارعا قانداي كەڭەس بەرەدى؟
- جۇرەك- قانتامىر اۋرۋلارى كوروناۆيرۋس ينفەكتسياسىمەن زاقىمدانۋ كەزىندە اسقىنۋدىڭ دامۋىنا اكەلە الادى. بۇعان ميوكارد جانە تامىرلاردىڭ سوزىلمالى اۋرۋلارىنىڭ دەكومپەنساتسياسى نەمەسە ولاردىڭ ەرەكشە (ۆيرۋستىق) زاقىمدانۋى جاتادى. نەگىزگى اۋرۋدىڭ دەكومپەنساتسيالانعان اعىمى ترومبوزدار، ءجىتى جۇرەك- وكپە جانە پوليورگاندىق جەتىسپەۋشىلىك قاۋپىن ارتتىرادى. بۇل رەتتە مىنالاردى ەستەن شىعارماۋ كەرەك:
1. ۆيرۋس جۇقتىرماس ءۇشىن ۇسىنىلاتىن پروفيلاكتيكالىق شارالاردى مۇقيات ورىنداۋ قاجەت؛
2. جۇرەك جانە قانتامىر اۋرۋلارى كەزىندە تاعايىندالعان ءدارى- دارمەكپەن ەمدەلۋدى توقتاتۋعا بولمايدى. بۇل دەنساۋلىقتىڭ جىلدام ناشارلاۋىنا اكەلۋى مۇمكىن؛
3. الدىن الا جوسپارلانعان وپەراتسيادان باس تارتۋعا بولمايدى.
جۇرەك نەمەسە قان تامىرىنىڭ كەي اۋرۋلارى كەشىكتىرگەن جاعدايدا جىلدام ءورشىپ، ءولىم جاعدايىنا اكەلۋى مۇمكىن. وپەراتسيا جاساۋ نەمەسە ونى كۇتە تۇرۋ ماسەلەسىن تەك قانا كارديولوگ شەشەدى.
- سۇحباتىڭىزعا راحمەت!