ەلوردادا «قۇراق كورپەدەن» شىرشا ورناتىلدى - فوتو

نۇر- سۇلتان. قازاقپارات - جاڭا جىل مەرەكەسى قارساڭىندا نۇر-سۇلتان قالاسىنىڭ ورتالىعىنا ەرەكشە شىرشا قويىلدى.

قولدان جاسالعان شىرشانى ازىرلەۋگە ەلىمىزبەن قاتار شەتەل ازاماتتارى دا بەلسەندىلىك تانىتتى، دەپ حابارلايدى قازاقپارات ءتىلشىسى.

«بۇگىن نۇر-سۇلتان قالاسىنىڭ ورتالىعىنا ەرەكشە فورماتتاعى شىرشا ورناتىلدى. بۇل مەنىڭ بالا كۇنگى ارمانىم. بۇل جەردە ءبىر جاعىنان كونەدەن كەلە جاتقان قولونەر ىسىنە جان بىتىرسەك، ەكىنشى جاعىنان تابيعاتقا جاناشىرلىق تانىتىپ، ەكو- شىرشانى دارىپتەۋ. تاعى ءبىر ەرەكشە ايتىپ وتەتىن ءسات. بۇل شىرشانى جاساپ شىعارۋعا ەلوردا عانا ەمەس ەلىمىزدىڭ باسقا دا وڭىرلەرىنەن ازاماتتار ۇلەستەرىن قوستى. اتاپ ايتقاندا، الماتى، اقتوبە، پەتروپاۆل قالالارىنان بەلسەندىلەر قاتىستى. ولاردىڭ جاس ەرەكشەلىكتەرى دە ءارتۇرلى، كىشكەنتاي بالادان، 80-دەگى اجەمىزگە دەيىن اتلاسىستى. سونداي- اق، بۇل جاڭا جىلدىق سىيدى ازىرلەۋگە وزبەكستان، رەسەي ازاماتتارى، ودان بولەك كەشە عانا افريكا ازاماتى ءبىزدىڭ قاتارىمىزعا قوسىلىپ، قول ۇشىن سوزىپ جاتىر»، - دەدى «قۇراق كورپەدەن» ەكو-شىرشا جاساۋ يدەياسىنىڭ اۆتورى، الەۋمەتتىك كاسىپكەر راحيما مۇقىشەۆا.

ونىڭ ايتۋىنشا، ەرەكشە شىرشانىڭ بيىكتىگى 6 مەتر، ونى جاساۋعا 70 مىڭ مەتر ماتا جۇمسالدى جانە 200 دەن استام ادام اتسالىستى.

«قۇراق كورپەدەن شىرشا جاساۋ يدەياسى تۋرالى Instagram پاراقشاسىنان ءبىلدىم. جاڭا جىل قارساڭىندا ەرەكشە يدەيا ۇسىنىپ جاتقان سوڭ، مەن دە ءوز ۇلەسىمدى قوسايىن دەپ شەشتىم. ونىڭ ۇستىنە قولىمنان توقۋ، ءىس تىگۋ كەلەدى. بۇل جەردە قۇراق 20/20 شارشى سانتيمەتردى قۇرايدى. شىرشانى جاساۋ كەزىندە قۇراق قۇراۋدى مەن دە ۇيرەنگىم كەلەدى دەپ قاتارىمىزعا قوسىلعاندار بولدى. كەشە جۇمىستى تولىعىمەن اياقتادىق، جالپى بۇل ءىستى جاقسى باستاما دەپ ويلايمىن. الداعى ۋاقىتتا بۇل يدەيا ودان ءارى جالعاسىن تاپسا دۇرىس بولار ەدى. ويتكەنى ءىس توقۋ، تىگۋ جانە قۇراق جاساۋ ءبىزدىڭ داستۇرىمىزدە بار نارسە. جانە وسكەلەڭ ۇرپاق ءۇشىن دە جاقسى ۇلگى»، - دەدى ەكو-شىرشانى جاساۋعا ۇلەس قوسقان ەلوردا تۇرعىنى زاۋرە ءۋالي قىزى. ايتا كەتسەك، «قۇراق كورپەدەن» جاسالعان ەرەكشە شىرشا ەلورداداعى «بايتەرەك» مونۋمەنتىنىڭ جانىنا ورناتىلدى.

اۆتور: ءالي يبرايەۆ