بۇل تۋرالى ق ر ىشكى ىستەر مينيسترلىگىنىڭ رەسمي وكىلى ءنۇردىلدا وراز ءمالىم ەتتى، دەپ حابارلايدى قازاقپارات ءتىلشىسى.
«شىمكەنتتىك پوليتسەيلەر ءبىر ۇلگىدەگى 11 جەڭىل كولىكتى ۇرلاپ كەتكەن ۇرىنى ۇستادى. سوڭعى 4 ايدا شىمكەنت قالاسىنىڭ تۇرعىندارىنان پوليتسياعا Daewoo Nexia ماركالى اۆتوكولىكتىڭ ۇرلانعاندىعى تۋرالى ارىز تۇسە باستاعان. ايتا كەتۋ كەرەك، بارلىق ۇرلانعان كولىكتەر دابىل بەلگىسىمەن جابدىقتالماعان جانە جارىقتاندىرۋ مەن بەينەباقىلاۋ كامەرالارى جوق اۋلالاردان ۇرلانعان»، - دەدى رەسمي وكىل.
ونىڭ ايتۋىنشا، قىلمىستىق ىزدەستىرۋ كەزىندە تەرگەۋشىلەر بارلىق فاكتىلەردى جان- جاقتى زەردەلەگەن. سىرتقى بەينەباقىلاۋ كامەرالارىنان بەينەماتەريالدار الىنىپ، زەردەلەنىپ، ولار بويىنشا بارلىق وقيعالاردىڭ حرونولوگياسى قالپىنا كەلتىرىلگەن.
«ناتيجەسىندە، قىلمىستى بايقاتپاۋ ءۇشىن كولىكتەردى تاڭەرتەڭگى ساعات 4-تەن 6 عا دەيىن ءبىر ادام ۇرلاعانى انىقتالعان. ول قالاعا كەشكى ساعات 8 دە كەلىپ، قاۋىپسىزدىك جۇيەلەرى بويىنشا ناشار اۆتوكولىكتەردى ىزدەگەن. جۇرگىزىلگەن اۋقىمدى جەدەل- ىزدەستىرۋ جۇمىستارىنان كەيىن، كولىك ۇرلىعىنا كۇدىكتىنى شىمكەنت قالاسىنىڭ ءال- فارابي اۋدانىنىڭ كريمينالدىق پوليتسيا قىزمەتكەرلەرى انىقتاپ، ۇستادى»، - دەدى ن. وراز.
كۇدىكتى ۋاقىتشا ۇستاۋ يزولياتورىنا قامالدى، قىلمىسقا ىقتيمال قاتىسۋشىلار انىقتالۋدا.
«كەيىن ونىڭ قاراپايىم سىزعىشتىڭ كومەگىمەن اۆتوموبيلدەردى اشقانى بەلگىلى بولدى. سودان كەيىن ول وتالدىرۋ قۇلپىن اشىپ، قوزعالتقىشتى ىسكە قوسىپ، ماشينانى ءمىنىپ كەتىپ وتىرعان. سونىمەن قاتار ول كولىكتەردىڭ نومىرلەرىن شەشىپ، ونىڭ ورنىنا ينتەرنەت ارقىلى ساتىپ الىنعان رەسەي فەدەراتسياسىنىڭ جالعان ءنومىر بەلگىلەرىن تاققان. ۇرلانىپ، باسقا ادامدارعا ساتىلعان 6 كولىكتى پوليتسيا تاركىلەپ، يەلەرىنە قايتارىپ بەردى. سونداي-اق، 2 اۆتوموبيل بولشەكتەلىپ ساتىلعانى انىقتالدى. قالعان 3 اۆتوكولىك الەۋمەتتىك جەلىلەر ارقىلى ساتىلعان، قازىرگى ۋاقىتتا ولاردى ىزدەۋ جۇمىستارى جۇرگىزىلۋدە. تەرگەۋ امالدارى جالعاسادى»، - دەدى رەسمي وكىل.
اۆتور: رۋسلان عابباسوۆ