Derekhub.kz پلاتفورماسى ول ءتۇرلى كوزدەردەن باعا تۋرالى اقپارات جيناۋدى قامتيدى. ساۋدا مينيسترلىگىنىڭ ىشكى ساۋدا دەپارتامەنتى ديرەكتورىنىڭ ورىنباسارى ەرلان ەشنازاروۆ تۇسىندىرۋىنشە، ءبىرىنشى كەزەڭدە بارلىق ساۋدا وبەكتىلەرىن (ءۇي جانىنداعى دۇكەندەر مەن ساۋدا جەلىلەرى) پورتالدا ءوز سورەلەرىندەگى الەۋمەتتىك ماڭىزى بار ازىق- تۇلىك باعاسى تۋرالى اقپاراتتى ءوز بەتىنشە ورنالاستىرۋعا شاقىرادى.
«ءاربىر ساۋدا نۇكتەسى ءوزىنىڭ جەكە كابينەتىن الىپ، جۇيەگە ءوز بەتىنشە تىركەلەدى. جانە كەيىننەن تاۋارعا ەڭ تومەنگى باعانىڭ جانە ونىڭ بار ەكەندىگىن كورسەتە وتىرىپ، 19 الەۋمەتتىك ماڭىزى بار ازىق- تۇلىك تاۋارلارىنان نىساندى تولتىرادى»، - دەيدى ەرلان ەشنازاروۆ.
تولتىرىلعان دەرەك اۆتوماتتى رەجيمدە تالدانادى جانە باعانىڭ وزگەرۋ ديناميكاسىن باقىلاۋعا مۇمكىندىك بەرەدى.
«مۇنداي پلاتفورمانىڭ يدەياسى پاندەميا كەزىندە قالىپتاستى. بيىلعى جىلى تاۋارلار مەن ءدارى- دارمەكتەردىڭ كۇرت جانە ايتارلىقتاي قىمباتتاۋىنا بايلانىستى كوكتەمدە بۇكىل ەل بويىنشا ءبىرقاتار تاۋاردىڭ شەكتى باعاسى ەنگىزىلدى، قازىر كەيبىر ايماقتاردا شەكتى باعا بەلگىلەنىپ جاتىر. ءبىراق باعانىڭ بەلگىلەنگەن شەكتە ۇستالۋىن تەكسەرۋ ءۇشىن اكىمدىكتەر ءىشىنارا تەكسەرۋ جۇرگىزۋى قاجەت. مۇنداي جۇيەنىڭ بولۋى باعانى قاشىقتان باقىلاۋعا مۇمكىندىك بەرەدى» - دەدى ەرلان ەشنازاروۆ. ۆەدومستۆونىڭ حابارلاۋىنشا، Derekhub.kz.
پلاتفورماسىن مەملەكەتتىك كىرىستەر كوميتەتىنىڭ سالىق قىزمەتىنىڭ اقپاراتتىق جۇيەسىمەن بىرىكتىرۋ جوسپارلانىپ وتىر. بۇل الەۋمەتتىك ماڭىزى بار ازىق- تۇلىك تاۋارلارىنا باعا بەلگىلەۋ تۋرالى بارىنشا تولىق كورىنىستى تالداۋعا مۇمكىندىك بەرەدى.
Derekhub.kz پلاتفورماسى سونداي- اق، جۇيەدە تىركەلگەن جانە الەۋمەتتىك ماڭىزى بار تاۋارلاردىڭ قۇنى مەن قورلارى تۋرالى اقپاراتتى تولتىراتىن كومپانيالار ءۇشىن ءبىرقاتار قىزمەتتى ۇسىنادى. وسىلايشا، پلاتفورماعا قاتىسۋشى كومپانيالار قۇقىقتىق ماسەلەلەر بويىنشا بيزنەستى قولداۋدىڭ تەگىن جەدەل جەلىسىنە، بۇلتتى فيسكالدىق قۇرالعا جانە Dosmart ادالدىق كارتاسىنا تەگىن جازىلىمعا، الفا بانكتەن كەپىلسىز نەسيە ونىمدەرىنە جانە تولەم قۇرالدارىنا قول جەتكىزە الادى. بۇدان باسقا، كومپانيالار سونداي- اق ءا م ا ت- تىڭ نارىقتىق باعالارى بويىنشا تۇراقتى تالدامالىق ەسەپتەرگە قول جەتكىزە الادى.
اۆتور: بالنۇر قوجاگەلدى