بەيسەنبى كۇنى ق ح ر سىرتقى ىستەر مينيسترلىگىنىڭ رەسمي وكىلى ۆان ۆەنبين وسىنداي مالىمدەمە جاسادى، دەپ حابارلايدى «قازاقپارات» ح ا ا مەنشىكتى ءتىلشىسى.
«جاقىندا ۇلىبريتانيا كوروناۆيرۋستىڭ جاڭا شتاممى انىقتالعانىن جاريالادى جانە بۇل جايلى دۇنيەجۇزىلىك دەنساۋلىق ساقتاۋ ۇيىمىنا حابارلادى. وزگە دە كوپتەگەن ەلدەر ۇلى بريتانيامەن اۋە قاتىناسىن توقتاتۋ، شەكارانى جابۋ بويىنشا شارالار قابىلداعانىن مالىمدەدى»، - دەدى ديپلومات.
«ۆيرۋستىڭ مۋتاتسياسى مەن ونىڭ ىقتيمال اسەرىن ەسكەرە وتىرىپ، ادام دەنساۋلىعىن ساقتاۋ ماقساتىندا، سونداي- اق باسقا مەملەكەتتەردىڭ تاجىريبەسىن ەسكەرە وتىرىپ، قىتاي ۇلى بريتانيامەن اۋە قاتىناسىن توقتاتادى»، - دەپ اتاپ ءوتتى ول.
بۇعان دەيىن كەيبىر قىتايلىق اۋە كومپانيالار قىتاي مەن ۇلى بريتانيا اراسىنداعى رەيستەردى توقتاتقان بولاتىن. سونىڭ ىشىندە ەڭ ءىرى China Southern Airlines تە بار. ۇلى بريتانياداعى ق ح ر ەلشىلىگى لوندون مەن مانچەستەردەگى ۆيزالىق ورتالىقتارىن جاۋىپ تاستادى. وتكەن دۇيسەنبىدە گونكونگ پەن ۇلى بريتانيا اراسىنداعى اۋە قاتىناسى دا توقتاتىلعان ەدى. گونكونگتىڭ دەنساۋلىق ساقتاۋ ورگاندارى وسى اپتادا ۇلى بريتانيادان ورالعان ەكى ستۋدەنتتىڭ ۇلى بريتانيادا تابىلعان كوروناۆيرۋستىڭ جاڭا شتاممىمەن اۋىرعانىن انىقتادى.