ۇلى اباي تويىنا ارنالعان اقىندار ءمۇشايراسىنىڭ جەڭىمپازدارى ماراپاتتالدى
رەسپۋبليكالىق ءمۇشايرادا توپ جارعان ۇزدىكتەر قاتارىندا ەلگە بەلگىلى اقىندار دا بار. سولاردىڭ ءبىرى ەلوردالىق جانات اسكەربەك قىزى باس جۇلدە يەگەرى اتاندى. ال قابيدەن قۋانىشباي ءبىرىنشى ورىندى ەنشىلەدى. جەڭىمپازدار مەن جۇلدەگەرلەرگە قارجىلاي سىياقى تابىستالدى.
اباي - رۋحانيات كوگىندە جارقىراعان ەرەكشە جۇلدىز. ونىڭ وشپەس جىرلارى، عاجايىپ اندەرى، ادامزاتتىق ويلارى مەن تەرەڭ ءبىلىمى ۇلتىمىز ءۇشىن اسىل مۇرا. قادىرىنە جەتىپ، ماڭگىلىك اسپەتتەي بىلسەك، ۇتارىمىز كوپ. پرەزيدەنت قاسىم- جومارت توقايەۆ بيىل ۇلى اقىننىڭ 175 جىلدىعىن تويلاۋعا مەملەكەتتىك ماڭىز بەردى. اباي شىعارمالارى كەڭ ناسيحاتتالا باستادى. الەم ەلدەرىندە تانىمالدىلىعى ارتتى.
جالپى رەسپۋبليكالىق دەڭگەيدەگى ءمۇشايرا جىل باسىندا جاريالاندى. اقىندار شىعارمالارىن ونلاين جولداپ، ماۋسىم ايىندا جەڭىمپازدار انىقتالدى. ءىس- شارانى ۇيىمداستىرۋعا ساكەن سەيفۋللين مۋزەيى ۇيىتقى بولدى.
نەسىپبەك ايت ۇلى، ق ر ەڭبەك سىڭىرگەن قايراتكەرى، اقىن:
- وسى ءبىزدىڭ ءمۇشايرادان قانشا اقىن شىعىپ جاتىر. ارمان شەريزات دەگەن. ءبىرىنشى ورىن العان قابيدەن قۋانىشباي بار. يسرايل ساپارباي سياقتى قازاقتىڭ ۇلكەن كورنەكتى اقىندارى دا بار. سوندىقتان ءبىز بايگەدە جاسقا قارامايمىز.
قابيدەن قۋانىشباي، اقىن:
- بۇل جەردە پوەزيانىڭ، ولەڭنىڭ بايگەسى بولدى. سوندىقتان بۇل جەردە ابايدىڭ رۋحى جەڭدى عوي دەپ ويلايمىن.
رەسپۋبليكالىق ءمۇشايرا ەلوردادا وسىمەن 10-مارتە ءوتتى. كەلەر جىلى دا جالعاسىن تابادى.
www.24.kz