ءبىلىم ءمينيسترى ماراپاتتى اقشاعا ساتىپ الۋ ءۇردىسىن توقتاتۋدى تالاپ ەتتى
ءبىلىم جانە عىلىم مينيسترلىگىنىڭ اپپارات وتىرىسىندا اسحات ايماعامبەتوۆ كەيىنگى كەزدەرى ءارتۇرلى اقىلى ماراپاتتاردىڭ كەڭ تاراپ كەتكەنىنە الاڭدايتىنىن جەتكىزدى. ايتۋىنشا، ولاردىڭ ديزاينى دا، اتى دا رەسمي بەكىتىلگەن ماراپاتتارعا ابدەن جاقىنداتىلعان.
«كەيبىرى تۇسىنبەي، باسقالارى ادەيى «ۇلت ۇستازى»، ىبىراي التىنسارين اتىنداعى، باسقا دا ءارتۇرلى توسبەلگىلەردى اقشا تولەپ، الىپ جاتىر. بۇل ماسەلەنى بىرنەشە رەت تالقىلاعان ەدىك. ءبىراق ءالى دە بۇل ءۇردىس ازايماي تۇر»، - دەدى اسحات ايماعامبەتوۆ.
وتىرىستا ءسوز العان ءبىلىم جانە عىلىم ۆيتسە- ءمينيسترى شولپان قارينوۆا ءبىلىم سالاسىندا بەكىتىلگەن ۆەدومستۆولىق رەسمي ناگرادالاردى اتاپ ءوتتى.
ولار: ىبىراي التىنسارين توسبەلگىسى، «قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى» توسبەلگىسى، «عىلىمدى دامىتۋعا سىڭىرگەن ەڭبەگى ءۇشىن» توسبەلگىسى، «ەڭبەك ارداگەرى» توسبەلگىسى، «قۇرمەت» گراموتاسى، العىس.
«بۇدان باسقا ءبىلىم سالاسىندا بەكتىلىگەن ەشقانداي ناگرادا جوق. سوندىقتان باسقا پايدالانىپ جۇرگەن، ساتىپ الىپ جۇرگەن ناگرادالارى دۇرىس ەمەس ءارى پەداگوگيكالىق ادەپكە سايكەس كەلمەيدى»، - دەدى شولپان قارينوۆا.
بۇدان كەيىن قايتا ءسوز العان اسحات ايماعامبەتوۆ بۇل ءۇردىستى توقتاتۋ كەرەكتىگىن ەسكەرتتى.
«وسى ماسەلە بويىنشا ءتۇسىندىرۋ جۇمىسىن جۇرگىزۋ قاجەت. ساتىپ الاتىن ماراپات - ماراپات ەمەس. ءبىر ارينە، كەيبىر جاعدايدا ءارتۇرلى قوعامدىق ماراپاتتار بولاتىنىن تۇسىنەمىز. ءبىراق ولار اقىلى بولماۋى كەرەك. ەگەر قوعامدىق ماراپات اقىلى بولسا، ونىڭ ەش قاسيەتى، قۇندىلىعى جوق. كەيبىر ارىپتەستەرىمىز تۇسىنبەي، وسىنداي ارەكەتتەرگە بارىپ جاتقاندار بار. ويتكەنى، بۇل ماسەلەنى كوتەرمەسەك بولمايدى. مەكتەپتەردە ءارتۇرلى اقىلى كونكۋرستار مەن وليمپيادالار بولماۋى كەرەك. ول تۇسىنىكتى شىعار. ءبىز تەگىن كونكۋرستاردىڭ سانىن كوبەيتەمىز»، - دەدى اسحات ايماعامبەتوۆ.
اۆتور: ايان بەكەن ۇلى