ءۇشىنشى توقساندا قانداي پاندەر ءداستۇرلى فورماتتا وقىتىلادى

نۇر- سۇلتان. قازاقپارات - ءبىلىم جانە عىلىم ءمينيسترى اسحات ايماعامبەتوۆ ءۇشىنشى توقساننان باستاپ ۇ ب ت جانە مەملەكەتتىك ەمتيحان تاپسىراتىن پاندەر ءداستۇرلى فورماتتا وقىتىلاتىنىن ءمالىم ەتتى، دەپ حابارلايدى قازاقپارات ءتىلشىسى.

«ءۇشىنشى توقساننان باستاپ 9 بەن 11-سىنىپ وقۋشىلارىنىڭ 70 پايىزى ءداستۇرلى فورماتتا وقيدى. اسىرەسە ۇ ب ت جانە مەملەكەتتىك ەمتيحان تاپسىراتىن پاندەر، سونىمەن قاتار قيىندىق تۋدىرىپ وتىرعان پاندەر دە ءداستۇرلى فورماتتا وقىتىلادى. سوندىقتان بۇل ماسەلە بويىنشا ساباق كەستەسىنە دەيىن ادىستەمەلىك ۇسىنىمداردى دايىنداپ، بۇگىن جىبەرەمىز. ءۇشىنشى توقساننان باستاپ تالقىلانعان ءتارتىپ بويىنشا جۇمىس جۇرگىزەمىز»، - دەيدى اسحات ايماعامبەتوۆ ءبىلىم جانە عىلىم مينيسترلىگىنىڭ اپپارات وتىرىسىندا.

ونىڭ ايتۋىنشا، گيمنازيالىق، ليتسەيلىك كومپونەنت بويىنشا قوسىمشا وتەتىن ساعاتتار بار.

«مىنە سول ساعاتتاردىڭ نەگىزىندە دە جالاقى تولەنەدى. سوندىقتان بۇل ماسەلە بويىنشا مەكتەپتىڭ وزدەرى اقىلداسىپ، ءتيىستى شەشىم قابىلداۋىنا بولادى. مۇنى دۇرىس ءتۇسىنىپ، ۇيىمداستىرۋ كەرەك. كوللەدجدەردەگى، جوعارى وقۋ ورىندارىنداعى ءبىرىنشى كۋرس ستۋدەنتتەرى بويىنشا تاياۋدا نۇكتە قويىلادى. ءالى ءبىر اي ۋاقىت بار. كەلگەن ورتاق شەشىم بويىنشا وقۋدى ۇيىمداستىراسىزدار»، - دەدى ول.

ەسكە سالايىق، وقۋ جىلىنىڭ III توقسانىنان باستاپ ءبىتىرۋشى سىنىپتار (9,11,12 - سىنىپتار) سانيتارلىق- ەپيدەميولوگيالىق تالاپتار ساقتالا وتىرىپ، ارالاس وقىتۋ (پاندەردىڭ % 70- ىن - ءداستۇرلى فورماتتا، % 30- ىن - قاشىقتان) فورماتىنا كوشىرىلەدى.

اۆتور: ايان بەكەن ۇلى