قازاقستاندىق ءانشى قىز فرانسيادا بىلعارى شەبەرىنە اينالدى
ول بۇرىن ءان سالۋمەن اينالىسقان ەدى، ءبىراق كوروناۆيرۋس كەلگەلى ويىن- ساۋىق ەشكىمگە كەرەك بولماي قالدى. سودان ءامينا بىلعارى كاسىبىن يگەرىپ، جەكە شەبەرحاناسىن اشىپ الدى. قازىر شەبەردى الەمگە تانىمال ءسان ءۇيى جۇمىسقا شاقىرىپ وتىر.
بيىلعى جىلدىڭ باسىندا ءامينا قۇدابايەۆا ءومىرى دە، كاسىبى دە تۇبەگەيلى وزگەرەتىنىن مۇلدە بىلمەدى. ناۋرىزدا ول دجاز- توپپەن كونسەرتتىك باعدارلاماسىن پىسىقتاپ جاتقان ەدى. ءبىراق اياق استىنان ىندەت كەلدى دە، كارانتينگە تاپ بولدى. سودان بەرى بىرنەشە كاسىپتىڭ باسىن شالدى. ءتاتتى ءپىسىرىپ، سابىن جاساپ، ءتىپتى سپورت سالاسىن دا كوردى. اقىرى بىلعارى ىسىنە توقتادى. ىندەت كەزىندە جاڭا كاسىپتى ينتەرنەت ارقىلى يگەرۋگە تۋرا كەلدى.
ءامينا قۇدابايەۆا، شەبەرحانا يەسى:
- تامىزدىڭ باسىندا 2 اپتا بويى ورىس شەبەرلەرىنىڭ، سوسىن تاعى ءبىر اپتا فرانسۋزداردىڭ ۆيدەوسىن قارادىم. ەڭ الدىمەن قانداي قۇرالدار قاجەت ەكەنىن ءبىلۋىم كەرەك بولدى. فرانسۋز تىلىندە اقپارات وتە از ەكەن. قازىر بارلىق قۇرال قولىمدا بار. ءبىراز نارسەنى جاساي الامىن. تەك كۇردەلى زاتتارعا جولامايمىن.
ءامينانىڭ جۇمىسى قاۋىرت، كۇنىنە 8-9 ساعاتىن شەبەرحانادا وتكىزەدى. بىلعارىنى بوياۋدان باستاپ، ىلگەك تاعۋعا دەيىنگى ءىستىڭ ءبارىن قولىمەن جاسايدى. فرانسيادا مۇنداي ەڭبەكتى وتە جوعارى باعالايدى. ءامينا ءامياندار، چەكتەرگە ارنالعان قاپتار، شاراپ سالاتىن جانە قىز- كەلىنشەكتەرگە ارنالعان سومكەلەردى ونلاين ساتادى. جاقىندا ول ءوزى تۇراتىن اۋىلدىڭ تۇڭعىش رەت اكىمشىلىك اۋلاسىندا شاعىن جارمەڭكە ۇيىمداستىردى. كوپ ۇزاماي وعان فرانسيانىڭ ەڭ اتاقتى ءسان ۇيىنەن جۇمىسقا شاقىرۋ ۇسىنىسى ءتۇستى. ول جەر - ءار بىلعارى شەبەرىنىڭ ارمانى.
ءامينا قۇدابايەۆا، شەبەرحانا يەسى:
- البەتتە، Hermes ءۇشىن سومكە جاساسام، وندا «مۇنى ءامينا قۇدابايەۆا جاساعان دەگەن جازۋ تۇرسا» جانە بۇعان قوسا، ونى بىرەۋگە الىپ بارسام كەرەمەت قوي، بۇل ۇلكەن ماقتانىش بولادى. سومكەلەرىن ساتىپ العان ادامعا شەبەرلەر وزدەرى اپاراتىن ءداستۇر بار. بىرەۋگە ءوز قولىڭنان شىققان ۇزدىك تۋىندىڭدى تابىستاۋ جانە ونىڭ كوڭىلىنەن شىعۋ - ارماننىڭ بيىك شىڭى دەپ بىلەمىن. نەگە وسىنى جاساماسقا؟
ءامينا بۇل كاسىپتى ءومىرىنىڭ مانىنە، ال ءان ايتۋدى حوببيىنە اينالدىردى. ءتىپتى ول شەبەرحاناسىنا «اق يول»، ياعني «اق جول» دەگەن اتاۋ بەردى. بۇل ونىڭ قازاق- نوعايدان تاراعان تەگىن بىلدىرەدى.
www.24.kz