حابار ارناسىندا «تەمىرتاس» تاريحي دراماسى كورسەتىلەدى
دراماتۋرگ اكىم تارازيدىڭ «اندرەي» اتتى ەسسە- اڭگىمەسىندەگى مانانا ەسىمدى مەدبيكەنىڭ بەينەسى، تەلەحيكايا سيۋجەتىنە ارقاۋ بولعان. فيلمدەگى وقيعا جەلىسى «جاس تۇلپار» ۇيىمىن قۇرۋشىلارىنىڭ ءبىرى - مۇرات اۋەزوۆتىڭ ەستەلىكتەرى ارقىلى ءوربيدى.
تەلەحيكايا XX عاسىردىڭ 60-جىلدارى ماسكەۋدەگى كۇتپەگەن كەزدەسۋدەن باستالادى. اندرەي دەگەن ستۋدەنت كۋرستاسى قازاق جىگىتىن ءوزىنىڭ اپكەسى مانانامەن تانىستىرادى. وسى ساتتە بويجەتكەن قاتتى قوبالجىپ، وزىنەن ءوزى كەشىرىم سۇراي باستايدى. مانانا 30-جىلداردىڭ باسىندا ارنايى تاپسىرمامەن قازاقستانعا كەلگەن مەدبيكە ەكەن. ونىڭ بايانداۋىمەن قازاقتارعا قۇپيا ۋكول سالىپ، قولدان جاسالعان گەنوتسيدتىڭ ءبىز بىلمەيتىن بەيمالىم سىرلارى اشىلادى.
بالتاباي سەيىتمامىت ۇلى، ق ر ەڭبەك سىڭىرگەن قايراتكەرى، اكتەر- رەجيسسەر:
- فيلمنىڭ ماعىناسى 1928 -جىلعى قازاقتىڭ باسىنا كەلگەن ناۋبەت قوي. 1982 -جىلعى كونفيسكاتسيا. اشا تۇياق قالماسىن، اسىرا سىلتەۋ بولماسىن دەگەن گولوشەكيننىڭ كەزىندەگى سول ءبىر اشا تۇياق قالدىرماي جەپ وتىرعان. قازاق ول كەزدە بيداي جەمەگەن. تەلەحيكايادا ءبىر اۋىلداعى قاسىرەت ارقىلى كۇيزەلگەن قالىڭ جۇرتتىڭ تاعدىرى كورىنىس تابادى. الاش قايراتكەرلەرى تۇرار رىسقۇلوۆ، ساكەن سەيفۋللين، وراز جاندوسوۆ، سۇلتانبەك قوجانوۆ، سەيىتقالي مەڭدەشيەۆتەردىڭ حالقى ءۇشىن قان جۇتقان ساتتەرى بەينەلەنەدى.
اكتەرلەر كەيىپكەرلەردى اشۋ ءۇشىن تىڭعىلىقتى دايىندالعاندارىن ايتادى.
بەيبىت قامارانوۆ، اكتەر:
- دايىندىقسىز بولمايدى. ويتكەنى ول 30- جىلدارداعى قازاقستان بولسا، ەندى ونىڭ تاريحىن وقىماي، ارى- بەرىسىن بىلمەي، وبرازدى سومداۋ ول اكتەر ءۇشىن كەشىرىلمەس دەپ ەسەپتەيمىن.
ايتار ويى سالماقتى، 16 بولىمنەن تۇراتىن «تەمىرتاس» تاريحي فيلمى ەرتەڭنەن باستاپ 21:40-تا «حابار» تەلەارناسىنان كورسەتىلەدى.
www.24.kz