الماتى وبلىسىندا اۋىل تۇرعىندارى ءوز بەتىنشە مەكتەپ سالىپ الدى
تاياۋدا وقۋشىلار جاڭا مەكتەپكە كوشتى. سەبەبى بۇرىنعى مەكتەپ ەسكىرىپ، جوندەۋ جۇمىستارىن جۇرگىزۋگە دە كەلمەگەن. ءبىر قىزىعى جاڭادان مەكتەپ سالۋعا اۋىل تۇرعىندارىنىڭ ءوزى اقشا جيناعان. اۋىل تۇرعىندارى Tengrinews.kz تىلشىسىنە قارجى قالاي جينالعانىن جانە مەكتەپ كىمنىڭ باستاماسىمەن سالىنعانىن ايتىپ بەردى.
باقالى اۋىلدىق وكرۋگىنىڭ اكىمى ارىن كۇرىشبايەۆتىڭ سوزىنشە، مەكتەپ قۇرىلىسى اۋىل ازاماتتارىنىڭ باستاماسىمەن جۇرگىزىلگەن.
«بۇرىن ەكى مەكتەپ بولعان. ولاردىڭ قۇرىلىسى ەسكى. ءبىزدىڭ بولاشاعىمىز - بالالار ءۇشىن سالىپ بەرەيىك دەگەن ويمەن جاسالدى. بۇگىندە مەكتەپ قۇرىلىسى ءبىتىپ، قولدانىسقا بەرىلدى. قۇرىلىس جۇمىستارى اقساقال باستاعان توپ، كوميسسيانىڭ باقىلاۋىندا بولدى. «كوپ تۇكىرسە كول« دەگەن راس ەكەن. قۇرىلىستى دا اۋىل ازاماتتارى جاسادى. قارجىنى كوبىنە اۋىل ازاماتتارى جينادى، ودان بولەك، كورشى اۋىلداعى ادامدار دا جينادى»، - دەيدى ارىن كۇرىشبايەۆ.
مەكتەپ سالۋ جۇمىستارىن جانە قارجى جيناۋعا بايلانىستى بەس ادامنان كوميسسيا قۇرىلعان. ونىڭ باسشىسى رەتىندە تالعات بايكۋريشوۆ تاعايىندالعان. ونىڭ ايتۋىنشا، كوميسسيادا ارنايى ەسەپشى بولعان. حالىققا تۇراقتى تۇردە ەسەپ بەرىلىپ وتىرعان.
«مەكتەپ قۇرىلىسى 2019 -جىلدىڭ 1-ساۋىرىندە باستالدى. ەسكى، سۋىق بولاتىن. اكىم جينالىسى بولعان كەزدە جاڭا مەكتەپ سالىپ بەرۋىن سۇراعانبىز. سول كەزدە كورشى اۋىلدارعا تاسىپ وقىتامىز دەدى. ءبىراق 0-سىنىپ وقۋشىلارىن تاسىپ وقىتۋ قيىنىراق بولدى. تاڭەرتەڭ تۇرعىزىپ، ودان كەيىن الىپ كەتۋ وڭاي ەمەس»، - دەيدى تالعات بايكۋريشوۆ.
ونىڭ ايتۋىنشا، باستاپقىدا ەسكى مەكتەپتى جوندەۋدەن وتكىزۋ تۋرالى وي بولعان.
«ءبىراق ول مەكتەپتى كورسەڭىزدەر، وعان جوندەۋ جۇمىستارىن جۇرگىزۋگە كەلمەيدى. ءسويتىپ، بىرىگىپ، مەكتەپ سالۋ تۋرالى كەلىستىك. سولاي مەكتەپ قۇرىلىسىن باستاپ كەتتىك. قۇرىلىس 1,5 جىلدا ءبىتتى»، - دەيدى ول.
قۇرىلىس كەزىندە اۋىر جۇمىستاردى اۋىل تۇرعىندارى جاساعان. ال ۇساق- تۇيەك جۇمىستارعا قۇرىلىسشىلار جالداعان.
«بۇل 0-4-سىنىپ ارالىعىنداعى باستاۋىش سىنىپ وقۋشىلارىنا ارنالعان مەكتەپ. قازىر 50 گە جۋىق وقۋشى بار. بۇگىندە 21 بالا ءبىلىم الىپ جاتىر. 4-سىنىپتان جوعارى وقۋشىلار كورشى اۋىلدارعا بارىپ وقيدى. ولاردى ارنايى اۆتوبۋس الىپ بارادى. وعان دا دەمەۋشىلەر قولداۋ كورسەتتى. بۇرىن بارلىق سىنىپ سۋىق بولاتىن. قازىر ءار سىنىپتا جىلۋ جۇيەسى بار»، - دەيدى تالعات بايكۋريشوۆ.
كوميسسيا باسشىسى قانشا قاراجات جينالعانىن جانە قۇرىلىس جۇمىستارىنا قانشا جۇمسالعانىن ايتتى.
«قۇرىلىس جۇمىستارىنا شامامەن 11 ميلليونداي كەتتى. قارجى بىرتىندەپ جينالىپ وتىردى. ءبىرى شاتىر جابۋعا ءبىر ميلليون تەڭگە بەرسە، ءبىرى تەرەزەسىن سالىپ بەردى، ءبىرى پەشىن جاساپ، جارىقتاردى ورناتىپ بەردى. زەينەتكەرلەر زەينەتاقىسىنان اقشا ءبولىپ، جاعدايى جەتكەندەر 100 مىڭ تەڭگەدەن بەردى. ەندى ءبىرى مال بەردى»، - دەيدى تالعات بايكۋريشوۆ.
ايتا كەتەيىك، اۋىل ازاماتتارىنىڭ ارقاسىندا زامان تالابىنا ساي باستاۋىش مەكتەپ 16-جەلتوقسان تاۋەلسىزدىك مەرەكەسى اياسىندا قولدانىسقا بەرىلدى. ءبىلىم ورداسىندا 4 مۇعالىم جانە 7 قىزمەتكەر ەڭبەك ەتەدى.