بوسنيا جانە گەرتسەگوۆينادا ابايدىڭ بيۋستى ورناتىلدى
بەلگىلى بوسنيالىق ءمۇسىنشى، بوسنيا مەن گەرتسەگوۆينا جوعارى قولدانبالى ونەر مەكتەبىنىڭ پروفەسسورى ستيەپو گاۆريچ جاساعان قازاقتىڭ ۇلى اقىنى جانە ويشىلى ابايدىڭ بيۋستى «سارايەۆو ەسكى قالاسى» تاريحي اۋدانىندا ورناتىلدى.
ەسكەرتكىش مەلياتسكا وزەنىنىڭ جاعاسىندا، ساۋلەت ونەرىنىڭ شەديەۆرلەرىنىڭ ورتاسىندا - 1891 -جىلعى مەريا، XVI عاسىرداعى حادجيا مەشىتى، ۇلتتىق كىتاپحانا جانە بوسنيا استاناسىنىڭ باسقا دا كورىكتى جەرلەرىنىڭ قاسىندا ورنالاسقان.
سارايەۆوداعى مادەني اكتسيا اياسىندا، ابايدىڭ تاڭدامالى شىعارمالار جيناعىنىڭ، سونداي-اق جاقىپبەك التايەۆتىڭ «ءال-فارابي - شىعىستان شىققان ۇلى ويشىل» كىتابىنىڭ تۇساۋكەسەرى العاش رەت ق ر قۇرمەتتى كونسۋلدىعى مەن «بۇركىت» ىسكەرلىك ىنتىماقتاستىق قاۋىمداستىعىنىڭ كومەگىمەن بوسنيا تىلىنە اۋدارىلىپ باسىلدى.
«سارايەۆو ەسكى قالاسى» مۋنيتسيپاليتەتىنىڭ مەرى يبراگيم حادجيبايريچپەن كەزدەسۋ بارىسىندا قازاقستان ەلشىسى تولەجان بارلىبايەۆ قالا بيلىگىنە ونىڭ تۋعانىنا 175 جىل تولۋىنا وراي اباي بيۋستىنىڭ ورناتىلۋىنا ىقپال ەتكەنى ءۇشىن زور ريزاشىلىعىن ءبىلدىرىپ، قازاق اقىنى مەن ويشىلىنىڭ الەمدىك رۋحاني جانە مادەني مۇراعا قوسقان زور ۇلەسىن اتاپ ءوتتى.
سارايەۆو ەسكى قالاسىندا 2021-جىلى قازاق مادەني ورتالىعىن اشۋ تۋرالى ۋاعدالاستىققا قول جەتكىزىلدى.
ديپلومات سونىمەن قاتار سارايەۆودا اباي ەسكەرتكىشىن ورناتۋ يدەياسىن جۇزەگە اسىرعانى جانە ونىڭ تاڭدامالى شىعارمالارىنىڭ جيناعىن شىعارعانى ءۇشىن بوسنيا مەن گەرتسەگوۆيناداعى ق ر قۇرمەتتى كونسۋلى امەل ديزداريەۆيچكە جانە «بەركۋت» بوسنيا ىسكەرلىك ىنتىماقتاستىق قاۋىمداستىعىنىڭ بەلسەندىلەرىنە ەرەكشە العىسىن ءبىلدىردى.